د بهرنیو چارو سرپرست وزیر له خپل ترکي سیال سره په ټیلیفوني اړیکه کې وویل چې په انقره کې د افغانستان سفارت له زلزله ځپلو سره د مرستې لپاره یو ټیم استولی او د اړتیا په صورت کې نورې طبي ډلې مرستې ته چمتو دي.

آوا - کابل: د بهرنیو چارو وزارت مطبوعاتي دفتر پرون (جمعه، دلو ۲۱) د یوې خبرپاڼې په خپرولو سره ویلي چې د اسلامي امارت د بهرنیو چارو د سرپرست وزیر مولوي امیرخان متقی د ترکیې د بهرنیو چارو وزیر مولود چاووش اوغلو سره ټیلیفوني خبرې وکړې او په ترکیه کې د وروستۍ زورورې زلزلې د ځاني او مالي زیانونو په اړه یې خبرې وکړې.
 
په پیل کې د بهرنیو چارو وزارت سرپرست مولوي امیرخان متقي یو ځل بیا د افغانستان د خلکو او دولت په استازیتوب د ترکیې د بهرنیو چارو وزیر ته د خپلې ژورې خواخوږۍ او ډاډګیرنې مراتب وړاندې کړل او ځان یې د ترکیې له وروڼو او خویندو سره په دې ستر غم کې شریک وباله.
 
متقي همداراز وویل چې اسلامي امارت د خپل توان په حدودو کې له ترکیې ملت سره د مرستې اعلان کړی او که وغواړي، د ژغورنې ډلې او طبي بیړنیو مرستو ته چمتو دي.
 
د بهرنیو چارو وزارت سرپرست زیاته کړه چې د افغانستان سفارت هم د زلزلې ځپلو سیمو ته د مرستې لپاره یو ټیم استولی دی.
 
د ترکیې د بهرنیو چارو وزیر د اسلامي امارت د بهرنیو چارو له سرپرست وزیر مولوي امیر خان متقي څخه د ټیلیفوني تماس او د تسلیت د څرګندولو له امله مننه وکړه او وروستۍ زلزله یې د ترکیې په تاریخ کې یوه تر ټولو سخته زلزله وبلله چې نږدې ټول هیوادونه یې اغیزمن کړي دي.
 
د ترکیې د بهرنیو چارو وزیر له مرستو څخه د مننې پرمهال زیاته کړه، چې افغانان او ترکان د تاریخ په اوږدو کې ملګري دي او که مرستې ته اړتیا وي، نو له خپلو افغان وروڼو به مرسته وغواړو.
 
په همدې حال کې د ترکیې ولسمشر په خپله وروستۍ وینا کې په ترکیه کې د زلزلې د قربانیانو شمېر ۱۹۳۸۸ او د ټپیانو شمېر ۷۷۷۱۱ اعلان کړ او د سوریې د زلزلې د قربانیانو شمېر ۳۵۰۷ او د ټپیانو شمېر له ۷۰۰۰ څخه زیات اعلان کړ.