د افغانستان په چارو کې د ملګرو ملتونو د سرمنشي ځانګړي استازي د عدلیې وزارت له سرپرست سره په کتنه کې د نړۍ له هېوادونو وغوښتل چې په افغانستان کې خپل سفارتونه پرانیزي.

آوا - کابل: د عدلیې وزارت نن (پنجشنبه، دلو ۲۰) د یوې خبرپاڼې په خپرولو سره ویلي چې د عدلیې وزارت سرپرست مولوي عبدالحکیم شرعي په افغانستان کې د ملګرو ملتونو د سرمنشي له ځانګړې استازې رزا اوتونبایوا سره وکتل. افغانستان.
 
په دې کتنه کې په افغانستان کې د ملګرو ملتونو د سرمنشي ځانګړي استازي د دغه سازمان د فعاليتونو په باب معلومات ورکړل او ويې ويل: د نړۍ له هېوادونو څخه غواړو چې په افغانستان کې خپل سفارتونه پرانيزي.
 
نوموړي له مدافع وکیلانو او د افغانستان له قضايي سیستم د یوناما دفتر ملاتړ اعلان کړ.
 
له بلې خوا د عدلیې وزارت سرپرست په دې کتنه کې وویل چې د افغانستان حقوقي او قضايي نظام په ټینګښت، عدالت او خپلواکۍ سره مخ په وړاندې روان دی.
 
هغه له نړیوالې ټولنې وغوښتل چې له اسلامي امارت سره د دښمنۍ پر ځای له دوی سره اړیکه ونیسي.
 
د عدليې سرپرست وزير هم د قوانينو په اړه معلومات ورکړل او ويې ويل، چې د قوانينو په رڼا کې ډېر کارونه شوي او د ډېرو رياستونو قوانين د بشپړېدو په حال کې دي.
 
نوموړي د مدافع وکيلانو د ستونزو په اړه معلومات ورکړل او ويې ويل، چې تر اوسه د شاوخوا ١٣٠٠ مدافع وکيلانو جوازونه تمديد شوي او شاوخوا ٦٠٠ نويو مدافع وکيلانو د ازموينې لپاره نوم ليکنه کړې او ډېر ژر به ازموينه واخلي.