د حيرتان او اقينې له بندرونو څخه د صادراتو او وارداتو له بندېدو وروسته د دغو بندرونو د نفتو او مايع ګازو د سوداګرو اتحاديه وايي، که له حيرتان اورګاډي څخه د لېږد بهير بېرته پيل نه شي، په هېواد کې به د تېلو بيه لوړه شي.

آوا - کابل: د دې اتحادیې مشر عبدالمومن ضیای د هرات د سرحدي بندر په زیرمو کې د نفتو د کمښت خبر ورکوي.
 
د حيرتان نفتي او مايع ګازو د سوداګرو اتحاديې مشر طلوع نيوز ته وويل: تقاضا ډېره ده، خو اکمالات نشته او د حيرتان بندر په زېرمو کې د مايع ګاز، پټرول او ډيزلو زېرمې په ټپه ولاړې دي.
 
خو د اوسپنې پټلۍ اداره وايي چې د اسلامي امارت یو پلاوی به د روانې اونۍ د چهارشنبې په ورځ ازبکستان ته ولاړ شي او د دغه هېواد له چارواکو سره به د حيرتان - ازبکستان د اورګاډي د پټلۍ د فعاليت د بيا پيل په موخه يو تفاهم ليک لاسليک کړي.
 
د افغانستان د صنایعو او کانونو خونې د حیرتان سرحدي بندر د مهمو سوداګریزو او ترانزیتي بندرونو په ګډون د هېواد د اقتصادي فعالیتونو د پراختیا لپاره طرحه کوي.
 
د افغانستان د صنایعو او کانونو د خونې مرستیال سخي احمد پیمان هم وویل: د حیرتان بندر د صادراتو او وارداتو په ځانګړي ډول د تیلو، اوړو، غنمو او نورو په برخه کې یو له مهمو بندرونو څخه دی.
 
د افغانستان د سوداګرۍ او پانګونې خونې د معلوماتو پر بنسټ، سوداګر د هرات له بندر څخه غالۍ، وچه او تازه مېوه او سبزیجات صادروي ​​او همدارنګه اوړه، غوړي او مایع ګاز واردوي.