خلک پوهېږي چې په افغانستان کې د اوسني حکومت د استازي له حضور پرته سیمه ییزې ناستې بریالۍ نه دي، ځکه د اسلامي امارت له جوړېدو سره سم د افغانستان په اړه څو نړیوالې او سیمه ییزې ناستې د افغانستان په اړه د اسلامي امارت استازو حضور پرته ترسره شوې دي، خو د افغانستان په وضعیت کې کوم ښه والی نه دی راغلی.

آوا: د افغانستان لپاره د روسیې ځانګړی استازی ضمیر کابلوف د جمعې په ورځ «تاس» خبری آژانس ته وویل چې د افغانستان په اړه یوه غونډه راتلونکې اونۍ په مسکو کې د ایران، هند پاکستان او چین د لوړ پوړو امنیتی چارواکو په حضور کې جوړیږی.
 
د سیاسي چارو کارپوه عزیزالله معارج له آوا سره په مرکه کې ویلي، چې په افغانستان کې د اوسني حکومت له شتون پرته نړیوالې او سیمه ییزې ناستې پایلې نه لري، ځکه د اسلامي امارت له واک ته رسېدو وروسته څو نړیوالې او سیمه ییزې ناستې وشوې.
 
هغه زیاته کړه، که د سیمې هېوادونه غواړي چې د افغانستان له خلکو سره مرسته وکړي او په سیمه کې د ترهګرۍ مخه ونیسي، باید اسلامي امارت په رسمیت وپېژني او زموږ د هېواد په اړه جوړې شوې غونډې ته دې د اسلامي امارت استازي را دعوت کړي.
 
دغه سیاسي کارپوه زیاته کړه، کله چې په سیمه ییزو غونډو کې د اسلامي امارت په اړه انتقادي نظر وي، نو لازمه ده چې د اسلامي امارت یو استازی یا استازی حاضر وي چې دلایل او څرګندونې وکړي.
 
په همدې حال کې د نړیوالو اړیکو کارپوه جمال الدین صمدي هم له آوا سره په مرکه کې ویلي، چې د اسلامي امارت د استازي له شتون پرته هره سیمه ییزه ناسته به نیمګړې او یو اړخیزه وي.
 
هغه څرګنده کړه: که د سیمې هېوادونه غواړي چې د انساني او نشه یي توکو د قاچاق په مخنیوي، د افغانستان خلکو ته د بشري مرستو په رسولو او په ځانګړي ډول د بنسټیزو پروژو په پلي کولو کې همکاري او اعتماد ولري، باید د اسلامي امارت استازو ته بلنه ورکړي.
 
د اسلامي امارت د بهرنیو چارو وزارت هم له دې وړاندې په سیمه ییزو غونډو کې د ګډون په نه کولو ناخوښي څرګنده کړې وه او ویلي یې وو چې د اسلامي امارت د استازو له ګډون پرته سیمه ییزې غونډې نیمګړې دي او په دغو غونډو کې د دوی استازو ته بلنه نه شي ورکولی. په تعامل منفي اغیزه لري.
 
دغه وزارت زیاته کړه، چې له نېکه مرغه افغانستان اوس یو خپلواک، مسوول او مشروع حکومت لري او توانېدلی چې په ټول هېواد کې امنیت تامین کړي، پولې خوندي وساتي او د سیمې او نړۍ له هېوادونو سره په سیاسي، اقتصادي او رغنده اړیکو ولري.