د افغانستان لپاره د ملګرو ملتونو د ځانګړي استازي مرستیال مارکس پوتزل د لومړي وزیر د دفتر له سیاسي مرستیال عبدالکبیر سره په لیدنه کې ویلي، چې ملګري ملتونه د افغانانو دین او کلتور ته درناوی لري، خو د افغانستان له روان وضعیت څخه راضي نه دي. اسلامي امارت باید په دې هیواد کې د ښځو د تعلیم او کار او ټول شموله حکومتولۍ په اړه د نړیوالې ټولنې غوښتنې ومني.

آوا - کابل: د اسلامی امارت د ویاند دفتر پرون (جدی ۱۴) یوه خبرپاڼه خپره کړې چې په کې ویل شوی، چې د ولسمشر د دفتر سیاسی مرستیال مولوی عبدالکبیر د ولسمشر ځانګړی استازی له مرستیال مارکوس پوتزل سره وکتل.
 
په دې کتنه کې مارکس پوتزل وویل چې په افغانستان کې د یوناما ماموریت او له افغانانو سره د ملګرو ملتونو بشري مرستې دوام لري.
 
هغه دا هم وویل چې یوناما د افغان حکومت او نړیوالې ټولنې ترمنځ د پل حیثیت لري او هڅه کوي چې د دوی ترمنځ واټن له منځه یوسي.
 
مارکوس پوتزل زیاته کړه، ملګري ملتونه د افغانانو دین او کلتور ته درناوی لري، خو د ښځو د تعلیم او کار په اړه له اوسني وضعیت څخه راضي نه دي او د امارت وروستي فرمانونه به د نړیوالې ټولنې پر کار او مرستو منفي اغېز وکړي. .
 
د افغانستان لپاره د ملګرو ملتونو د ځانګړي استازي مرستیال زیاته کړه، اسلامي امارت باید په دغه هېواد کې د ښځو د تعلیم او کار او ټول شموله حکومتوالۍ په اړه د نړیوالې ټولنې غوښتنې ومني.
 
له بلې خوا د صدراعظم د دفتر سیاسي مرستیال مولوي عبدالکبیر ویلي چې اسلامي امارت د تسلیمۍ لپاره ټول شرایط پوره کړي او ملګري ملتونه باید په دغه اداره کې د افغانستان واک دوی ته وسپاري.
 
هغه وویل چې اسلامي امارت د ملګرو ملتونو د رول ستاینه کوي او زیاته یې کړه چې موږ له نړۍ سره ښه تعامل غواړو او یوناما په دې برخه کې همکاري وکړي.
 
د رئیس الوزرا سياسي مرستيال دغه راز وويل چې اسلامي امارت يو ټول شموله حکومت ته ژمن دى او په اوسني حکومت کې د هر قوم او هر ولايت خلک شته او لا هم هلې ځلې روانې دي چې داسې کسان شامل شي چې پوه او ژمن کسان وي.
 
نوموړي په ډاګه کړه، اسلامي امارت د دیني او عصري علومو زده کړه د هر افغان حق ګڼي او د ښځو د زده کړې او کار لپاره د مناسب چاپېریال د رامنځته کولو په موخه د افغانانو د دین او کلتور په روښانولو بوخت دی.
 
مولوي عبدالکبیر زیاته کړه، اسلامي امارت هیچا ته اجازه نه ورکوي چې د افغانستان خاوره د بل پر ضد وکاروي او په دې اړه یې بې اساسه ادعا ردوي.
 
هغه زیاته کړه چې د افغانستان اسلامي امارت د هیڅ هیواد په چارو کې لاسوهنه نه کوي او هیچا ته به هم اجازه ورنکړي.
 
دا په داسې حال کې ده چې د افغانستان لپاره د ملګرو ملتونو د ځانګړي استازي مرستیال مارکوس پوتزل هم د کورنیو چارو له سرپرست سراج الدین حقاني سره په لیدنه کې د تعلیمي مرکزونو د بیا پرانیستلو او د ښځو د کار د حق غوښتنه کړې وه.