د سوداګرۍ او صنایعو وزارت چارواکي وايي، د اسلامي امارت د کابینې د پرېکړې پر اساس ټول دولتي ادارې مکلفې دي، چې له کورنیو تولیداتو څخه څومره چې ممکنه وي ګټه واخلي.

آوا - کابل: عبدالسلام اخندزاده جواد؛ د صنايعو او سوداګرۍ وزارت وياند د چهارشنبې په ورځ (جدی ۴) د آوا خبريال ته وويل، چې د کابينې په ۱۹ مه غونډه کې د دغه وزارت د وړانديز پر بنسټ پرېکړه وشوه، چې دولتي ادارې دې له کورنيو توليداتو کار واخلي.
 
هغه زیاته کړه، د کابینې دا پرېکړه به د اقتصادي خودکفایۍ، د کارموندنې او پانګوالو د هڅونې سره مرسته وکړي.
 
جواد څرګنده کړه، د کابینې په غونډه کې پرېکړه وشوه، چې د اطلاعاتو او کلتور، حج او اوقافو، پوهنې، لوړو زده کړو او نورو اړوندو وزارتونو او ادارو د کورنیو تولیداتو او محصولاتو د استفادې په اړه دې خلکو ته معلومات ورکړل شي.
 
نوموړي دغه راز د فابريکو او فابريکو له خاوندانو وغوښتل، چې د خپلو توليداتو د کيفيت د لوړولو په برخه کې خپلې ټولې هڅې وکړي.
 
د جواد د څرګندونو پر بنسټ، افغانستان د ۶۳ توکو په تولید کې پر ځان بسیا شوی او له بهر څخه یې واردولو ته اړتیا نشته.
 
په ورته وخت کې د صنعت او سوداګرۍ وزارت د کورنیو تولیداتو کارولو ته د خلکو د هڅولو او ملاتړ لپاره کمپاین پیل کړی دی.
 
د افغانستان د سوداګرۍ او پانګونې خونې غړي خانجان الکوزي هم د چهارشنبې په ورځ د یوې خبري ناستې په څنډه کې د آوا خبریال ته وویل چې دغه خونه د اسلامي امارت د دغه اقدام هرکلی کوي او د هېواد د اقتصاد په وده او سمسورتیا کې یې اغېزمن ګڼي. .
 
په همدې حال کې یو شمېر اقتصادي کارپوهان وايي چې د اسلامي امارت دغه طرحه کولای شي یو شمېر شرکتونه له افلاس څخه وژغوري.
 
د اقتصادي چارو کارپوه عبدالناصر رشتیا وايي، په تېر کال کې یو شمېر تولیدي شرکتونه د اقتصادي ستونزو له امله له افلاس سره مخ شوي دي. مګر دا عمل کولی شي دوی له افلاس څخه وژغوري او هم به اغیزمنه پانګه اچونه وهڅوي.
 
په همدې حال کې د اسلامي امارت کابینې دولتي ادارو ته امر کړی چې له کورنیو تولیداتو څخه کار واخلي، ځکه چې اوسمهال افغانستان زیاتره توکي له بهر څخه واردوي.