د جوزجان ولايت د پوهنې مسئولينو د دغه ولايت د دولسم ټولګيو د زده کوونکو د فراغت په مراسمو کې وويل چې سږ کال په دغه ولايت کې څه باندې ٤٥٠٠ تنه نارينه او ښځينه زده کوونکي له دولسم ټولګي څخه فارغ شوي دي.

آوا - مزارشریف: د جوزجان ولایت د پوهنې ریاست نن (یکشنبه، جدی ۱۱) د شبرغان ښار د ابن یمین په لېسه کې د یو لړ مراسمو په ترڅ کې د نارینه زده کوونکو فراغت ولمانځله.
 
دغه مراسم د پوهنې د رئيس، د ولايت مقام د رئيس، ديني عالمانو، استادانو، د جوزجان ولايت د پوهنې د رئيس او د هغوى د کورنيو په شتون کې ترسره شول.
 
دجوزجان ولايت دپوهنې رئيس محمد طاهر جواد په دې مراسمو کې وويل: په ١٤٠١ ښوونيز کال کې دجوزجان له مرکز او ولسواليو څخه څه دپاسه ۴۵۰۰ هلکان او نجونې له دولسم ټولګي څخه فارغ شول.
 
د جوزجان د پوهنې رئیس وايي، نن د جوزجان له بېلابېلو ښوونځیو ۵۶۴ هغو هلکانو ته د فراغت سندونه ورکړل شول، چې له بېلابېلو ښوونځیو فارغ شوي وو.
 
د جوزجان ولایت یو تن دیني عالم غول الدین المبرور هم په دې مراسمو کې وویل: اسلامي امارت به د اسلامي نظام له احکامو سره سم ژر تر ژره د ښځینه طبقې پر مخ د تعلیم دروازې پرانیزي.
 
په همدې حال کې د جوزجان د ښوونځیو د دولسم ټولګیو فارغانو د ځوانانو لپاره د ښوونیزو برخو او ښو ښوونیزو پروګرامونو د برابرولو غوښتنه وکړه.