د افغانستان د صنایعو او سوداګرۍ وزارت چارواکي وايي، په تېرو ۸ میاشتو کې د هوايي دهلېزونو له لارې تر ۸۰۰ ټنه ډېر توکي هند ته صادر شوي دي.

آوا - کابل: د صنعت او سوداګرۍ وزارت ویاند اخندزاده عبدالسلام جواد د آوا خبریال ته وویل چې په تیرو ۸ میاشتو کې څه باندې ۶۰۰ ټنه مالونه چې غالۍ، جلغوزی، شنګ او د هوايي دهلېز له لارې چين ته لاسي صنايع صادر شول.
 
جواد زياته کړه، چې په همدې موده کې يې شاوخوا ٢٠٠ ټنه نور توکي د يوه خصوصي شرکت له لارې هند ته او هم د دوبۍ له لارې نورو هېوادونو ته صادر کړي دي.
 
جاوید د دې په بیانولو سره چې په تیرو اتو میاشتو کې مو له ۱،۲ میلیارد ډالرو څخه زیات صادرات کړي، زیاته کړه چې د صادراتو تر ټولو زیات عاید د هوایي دهلیز له لارې ترلاسه شوی دی.
 
د صنایعو او سوداګرۍ وزارت ویاند همداراز ټینګار وکړ، چې دغه وزارت هڅه کوي د افغانستان او نورو هېوادونو ترمنځ هوايي دهلېز رامنځته کړي، څو د افغان سوداګرو د توکو د صادراتو لپاره لا زیات فرصتونه برابر شي.
 
له بلې خوا سوداګر ټینګار کوي چې له نورو هېوادونو سره باید هوايي دهلېزونه فعاله شي، څو د دوی صادرات په ځانګړي ډول جلغوزي ته لاره هواره شي.
 
د دوی د څرګندونو پر بنسټ، اوسنیو حالاتو ته په پام سره اړتیا ده چې د توکو د صادراتو لپاره له اروپایی هېوادونو سره مستقیم هوایی دهلېزونه جوړ شی.
 
د سوداګرۍ او پانګونې خونې د شمېرو پر بنسټ، په ۱۴۰۰ هجري لمریز کال کې ۵ زره ټنه جلغوزي د هوايي دهلېز له لارې له هېواده بهر صادر شوي دي.
 
خو د مالیې وزارت د هوايي دهلیزونو له لارې د وارداتو او صادراتو د زیاتوالي اعلان وکړ او ویې ویل، چې په تېرو ۱۵ میاشتو کې شاوخوا ۸ میلیارده افغانۍ واردات او د ۴،۳ میلیارد افغانیو په ارزښت صادرات شوي دي.
 
د مالیې وزارت ویاند احمدولي حقمل نن رسنیو ته وویل، چې دغه وزارت د هوايي دهلېز له لارې شاوخوا یو میلیارد افغانۍ عواید راټول کړي دي.