په راتلونکي ژمي کې د بیړنیو حالاتو په اړه پرون چهارشنبه په هرات ولایت کې غونډه جوړه شوه چې په کې د هرات والي، د دولتي ادارو او غیر دولتي ادارو مسوولینو ګډون کړی و. په دې غونډه کې هغه پروګرام چې له طبيعي پيښو سره د مبارزې د رياست د بيړنيو حالاتو د کميټې له خوا چمتو شوى و؛ په دې غونډه کې تصويب شو.

آوا: د هرات والی په نننۍ ناسته کې د ۱۴۰۱ کال د ژمي او پسرلي د ۱۴۰۲ کال د پلان، د تاسیساتو، ظرفیتونو او د غیر دولتي بنسټونو د همغږۍ په اړه بحث او د نظر تبادله وشوه.
 
د هرات ولايت له طبيعي پېښو سره د مبارزې رئيس حافظ محمد هاشم خالد د ټولو اړوندو ادارو او مرکزونو د همکارۍ غوښتنه وکړه او ويې ويل: په سړه موسم کې بايد ټول رياستونه له موږ سره همکاري وکړي، څو وکولای شو خلکو ته په بېلابېلو برخو کې خدمات وړاندې کړو.
 
له بلې خوا د همکارو بنسټونو مسوولینو په بیړنیو حالاتو کې له زیانمنو سره د هراړخیزې همکارۍ اعلان وکړ او ویې ویل، چې د هرات سیمه ییزه اداره دې د ولسوالیو په کچه د همغږۍ په موخه له موږ سره خپلې همکارۍ زیاتې کړي.
 
دغه راز د هرات والي شیخ نوراحمد اسلام جار هم په دې کتنه کې څرګنده کړه: موږ په قوي اراده او د خدای په دربار کې د خپل ملت د ستونزو د حل لپاره کار کوو.
 
د هرات والي دغه راز له تخنيکي ټيمونو وغوښتل چې د پيښې له رامنځته کيدو مخکې درملنه وکړي او خلکو ته خبر ورکړي چې په کومو سيمو کې بارانونه کيږي تر څو له خطر سره مخامخ نه شي.
 
ويل کيږي چې په دې غونډه کې د اطلاعاتو او فرهنګ رياست، د ولايت مقام د دارالانشا رييس او د دغه ولايت د ملي تلويزيون مسوولينو ته دنده وسپارل شوه چې د اورښتونو او هوا د حالاتو په اړه خلکو ته معلومات ورکړي.