د چین د بهرنیو چارو وزارت تایید کړه چې په کابل کې پر یوه هوټل د وسله والو کسانو په برید کې پنځه چینايي اتباع ټپیان شوي دي.

آوا - کابل: د کابل په نوي ښار کې پر یوه هوټل چې چینايي اتباع په کې میشت وو، د ځانمرګو بریدګرو له برید وروسته د چین د بهرنیو چارو وزارت اعلان وکړ چې په کابل کې د چینايي اتباعو پر استوګنځي برید شوی دی.
 
د دوشنبې په ورځ، د قوس په ۲۱ مه ځانمرګي بریدګر د کابل په نوي ښار کې د یوه هوټل په ودانۍ کې چې چینايي اتباع په کې میشت وو، برید وکړ.
 
د چین د بهرنیو چارو وزارت د یوې خبرپاڼې په خپرولو سره ویلي چې په کابل کې د چینايي اتباعو پر استوګنځي د برید په پایله کې ۵ تنه ټپیان شوي دي. د چین د بهرنیو چارو وزارت په اعلامیه کې دا هم ویل شوي چې دا برید د چین لپاره ټکان ورکوونکی دی.
 
خو ذبیح الله مجاهد؛ د اسلامي امارت ویاند د اسلامي امارت د ځواکونو او ځانمرګو بریدګرو تر منځ له نښتې وروسته په خپل ټویټر کې لیکلي چې د هوټل ټول میلمانه ژغورل شوي او هیڅ بهرنی هم پکې وژل شوی نه دی.
 
د هغه په ​​وينا، يواځې دوه بهرنيان چې له کور څخه يې ځانونه غورځولي، ټپيان شوي دي.
 
داعش ترهګرې ډلې د اګست په ۲۱مه نېټه په یوه نا اعلان شوي خبر کې ادعا وکړه چې د چینايي دیپلوماتانو او اتباعو پر مېلمستون په برید کې لږ تر لږه ۳۰ تنه وژل شوي او ټپیان شوي دي.
 
دا برید په داسې حال کې کېږي چې له دې پېښې یوه ورځ وړاندې د چین سفیر د اسلامي امارت د بهرنیو چارو وزارت له سیاسي مرستیال شېرمحمد عباس ستانکزي سره په کتنه کې له هغه وغوښتل چې د دغه هېواد امنیت ته ځانګړې پاملرنه وکړي. سفارت
 
د یادولو وړ ده چې د روسیې او پاکستان پر سفارتونو له برید وروسته دا دریم بهرنی هدف دی چې په کابل کې د داعش لخوا ترسره کیږي.