د نړۍ د غوره میرمنې حضرت فاطمه زهرا (س) د شهادت د ورځې په مناسبت دیني پوهان وايي: مسلمانې ښځې باید د حضرت فاطمې زهرا (س) د سیرت پیروي وکړي تر څو د اسلام او د دیني مقدساتو ارزښتونه په نړۍ کې وساتني.

آوا - کابل: د افغانستان د شیعه علماو د شورا غړی صالح صدر له آوا سره په مرکه کښې وویل: په اسلام کښې ښځې ته تر ټولو لوړ او کامل مقام ورکړی شوی دی. دا مهمه خبره رسول (ص) د خپلې لور سره په مينه کې ښودلې ده او حضرت فاطمې زهرا (س) ته د ام ابيها لقب ورکړ.
 
صدر يوه کيسه ياده کړه او ويې ويل: يوه ورځ د اسلام ستر پيغمبر (ص) په جومات کې ناست و، تر دې چې حضرت زهرا (س) مسجد ته داخل شو، رسول الله (ص) ورته په احترام سره وپاڅېد او سلام يې وکړ. د هغې سره یې په خپل ځای کې ډیر درناوی وکړ چې د رسول (ص) دا کړنه د نړۍ ټولو مسلمانانو لپاره یو درس کیدی شي چې په اسلام کې د ښځو مقام څرګند کړي.
 
  هغه د حضرت فاطمه زهرا (س) د ژوندی او ابدی پیغامونو ځینې یادونه هم وکړه او ویې ویل: لومړی پیغام عبادت ته اهمیت ورکول دی، په دې باره کښې له امام حسن مجتبی (ع) څخه روایت دی چې زما مور په لمانځه کښې ډیره ټینګه وه.
 
دوهم پیغام، د ښځې دنده د ماشومانو پالنه ده، حضرت زهرا (س) د دې توان درلود چې ماشومان لوی کړي او ټولنې ته یې وړاندي کړي، چې هره یوه یې د مبارزې، زړورتیا او عاجزۍ نمونه وه.
 
صدر وویل، د حضرت زهرا (ع) د ژوند بل پیغام مبارزه ده، هغه د ژوند تر وروستۍ شېبې پورې له حق څخه د باطل دفاع وکړه.
 
صدر څرګنده کړه: مبارزه بېلابېل اړخونه لري او فاطمه زهرا (س) دغو ټولو ته د شرایطو او زمانې له نظره ډېره پاملرنه کړې ده، نو ځکه باید مسلمانې ښځې د ارزښتونو، عقایدو او په ټولیزه توګه د هر څه د ساتلو لپاره دغه روحیه ولري.
 
صدر په پای کې زیاته کړه: حضرت زهرا (س) د خپل ژوند تر وروستۍ شیبې پورې د اسلام او د خپل وخت د امام (حضرت علی) له ارزښتونو دفاع وکړه.