د افغانستان لپاره د امریکا ځانګړي استازي د یوه ټویټ په خپرولو سره هند ته د خپل سفر او د دغه هېواد له چارواکو او د سولې د عالي شورا له پخواني رییس عبدالله عبدالله سره د لیدنې خبر ورکړی دی. د هغه په وينا، په نړيواله ټولنه کې اجماع شته چې افغانان دې د خبرو اترو مشري او بڼه خپله کړي.

آوا: نوموړي نن سهار (قوس ۱۵) په یوه ټویټ کې لیکلي چې د هند د بهرنیو چارو وزارت له ویاند او د دغه هېواد د ملي امنیت له مرستیال سره په افغانستان کې د هند او امریکا ګډې ګټې اړه خبرې کړې دي.
 
ویسټ وویل چې متحده ایالات د هند د سخاوتمندانه بشردوستانه مرستو او د افغانانو د اساسي حقونو لپاره د ژمنتیا ستاینه کوي.
 
د امریکا ځانګړی استازی وايي، په هند کې یې د افغانستان د پخلاینې د عالي شورا له پخواني رییس عبدالله عبدالله سره کتلي او د افغانانو ترمنځ یې د ملي سیاسي ډیالوګ پر بیړنۍ اړتیا خبرې کړې دي.
 
هغه زیاته کړه چې په نړیواله ټولنه کې اجماع شته چې افغانان باید د خبرو اترو مشري وکړي او بڼه خپله کړي.
 
توماس ویسټ جاپان ته هم په یوه سفر تللی چې تمرکز یې پر افغانستان دی او متحده عربي اماراتو ته هم ځي.