آوا - د بدخشان ساړه ژمي؛ لرې پرتو سیمو ته د خوراکي توکي او درمل لیږل شوی دي

د بدخشان ساړه ژمي؛ لرې پرتو سیمو ته د خوراکي توکي او درمل لیږل شوی دي

په لرې پرتو سیمو کې د واورې د اورښت له پیل او د بدخشان په یو شمېر ولسوالیو کې د ترانسپورتي لارو له بندېدو سره هم مهاله د دغه ولایت سیمه ییز چارواکي وايي، د دغو سیمو اوسېدونکو ته یې د پنځو میاشتو خوراکي او طبي توکي لېږلي دي.

آوا - مزارشريف: د واخان، نسي، شغنان، کوفاب، زېباک او ميمنې ولسواليو ترانسپورتي لارې هر کال د سړې موسم له رارسېدو سره تړل کېږي او د دغو سيمو اوسېدونکي د برېښنا د نشتوالي په ګډون له ګڼو ستونزو سره مخ کېږي.

خو د بدخشان سيمه ييز چارواکي وايي، چې سږ کال د دغه ولايت د لرو پرتو سيمو لپاره لازم تدابير نيول شوي او د تېرو کلونو ستونزې به نه وي.

د بدخشان مرستیال والي نثار احمد احمدي نن دوشنبه (قوس ۱۴) آوا ته وویل چې سیمه ییز حکومت د همکارو بنسټونو په همکارۍ د دغه ولایت لرې پرتو ولسوالیو ته د پنځو میاشتو خوراکي توکي او درمل استولي دي.

د بدخشان د والي مرستيال زياته کړه چې په نږدې راتلونکي کې به نورې اسانتياوې د دغه ولايت لرو پرتو او ناامنو ولسواليو ته ولېږدول شي.

د احمدي په وينا، په دې وروستيو اوونيو کې له کابل څخه هم چارواکي د بدخشان پاميرونو ته تللي وو او د ستونزو د څېړلو پر مهال يې له دوى سره د يو شمېر خوراکي او خيمو مرسته کړې وه.

له دې سره سره د بدخشان د والي مرستیال وايي، چې ورکړل شوې مرستې لا هم کافي نه دي او باید مرستندویه ادارې د دې ولایت د ولسوالیو وضعیت ته پام وکړي.

بدخشان ولایت د خپلې غرنۍ جغرافيې او سختو لارو له امله هر کال د ژمي په موسم کې د سختو واورو د اورښت او د ترانسپورتي لارو د بندېدو شاهد وي.

سربیره پردې، د طبیعي پیښو لکه د واورې ښویدنې پیښې په ډیری سرحدي ولسوالیو کې خلک له ډیرو ننګونو سره مخ کوي.