د سرپرست حکومت د رسنیو د مرکز مشر انعام الله سمنګاني په خپله ټویټر پاڼه لیکلي چې په ټول هیواد کې د جمعې د لمانځه د یوې خطبې د لوستلو وړاندیز د اسلامي امارت د مشر ملا هبت الله آخندزاده لخوا تصویب شو. هغه لیکلي چې د جمعې امامان د خطبې په لوستلو سره خپل اتفاق او اتحاد څرګند کړي.

آوا: د سرپرست حکومت د رسنیو د مرکز مشر انعام الله سمنګاني نن یکشنبه (عقرب ۲۹) په خپل ټویټر کې لیکلي، چې د ارشاد، حج او اوقافو وزارت هغه وړاندیز چې د هیواد د ټولو جوماتونو د امامانو او مبلغین لپاره د یوې واحدې خطبې لپاره ترتیب شوی، د اسلامي امارت د رهبرۍ له لوري تصویب شوی او د خطبې اساسات، دودونه او آداب په کې په پام کې نیول شوي دي.
 
هغه ټینګار وکړ چې د ټولو جوماتونو امامانو او خطیبانو ته لازمه ده چې د جمعې په ورځ د دې خطبې په لوستلو سره خپل یووالی څرګند کړي.
 
په ورته وخت کې د حج او اوقافو وزارت اعلامیه هم وايي چې د جمعې د ورځې خطبه ښه اخلاق او سپارښتنې لري، لکه د وخت د امیر او واکمن لپاره د خیر دعا کول.
 
دغه وزارت زیاته کړې ده چې د سلطان او د وخت د حاکم لپاره دعاګانې د صحابه کرامو په زمانه کې هم شوي او د شاه (ظاهرشاه) د واکمنۍ پر مهال هم د جمعې د لمانځه په خطبه کې د هغه لپاره دعاګانې شوې دې.
 
د حج او اوقافو وزارت د اعلامیې له مخې، د اسلامي امارت د پخواني حکومت پر مهال هم د جمعې د لمانځه په خطبو کې د ملا محمد عمر مجاهد لپاره دعا کیدله.