آوا - د باميان کروندګرو اصلاح شوي تخمونه ترلاسه کړل

د باميان کروندګرو اصلاح شوي تخمونه ترلاسه کړل

د خوړو نړیوال سازمان په بامیان ولایت کې د کرنې او مالدارۍ د پیاوړتیا په موخه ۱۰۰۰ بزګرانو ته اصلاح شوي تخمونه او د څارویو خواړه وویشل.

آوا: د خوراک نړیوال سازمان چارواکي وايي چې د دغه مرستې د پروګرام موخه په بامیان ولایت کې د کرنې او مالدارۍ پیاوړتیا او ملاتړ دی.

د باميان د کرنې، اوبولګولو او مالدارۍ رئيس مولوي ذبيح الله رب دوست هم وويل، چې په دې موده کې درې زره کروندګر او بڼوال د خوړو او کرنې د نړيوال سازمان له مرستو برخمن شوي دي.

دده په وینا؛ هر بزګر ته سل کیلو ګرامه سپین او تور کیمیاوي سرې او هر بزګر ته دوه سوه کیلو ګرامه د څارویو خواړه ورکړل شول.

د باميانو کروندګرو او مالدارانو د خوړو او کرنې د نړيوال سازمان له دغه اقدام څخه خوښي څرګنده کړه او ويې ويل، چې د دا ډول مرستو په پلي کېدو سره به يې کار او عايد زيات شي.