روسیې ویلي چې د نورډ سټریم ۱ پایپ لاین له لارې یې اروپا ته د تخنیکي دلایلو له امله د ګازو رسول بند کړي دي. اروپايي هېوادونه د روسيې پرله پسې د ګازو کمول د مسکو له لوري د سياسي فشار په توګه ګڼي، چې په اروپا کې يې د انرژۍ بحران لاپسې کړکېچن کړی او د ګازو د زېرمو د ډکولو هڅې يې پېچلې کړې دي.

آوا: روسیې د چهارشنبې په ورځ اروپا ته د ګازو د یوې مهمې پایپ لاین له لارې د ګازو د انتقال مخه ونیوله. د روسیې د ګازپروم شرکت اعلان کړی چې د اګست له لومړۍ نیټې څخه د سپټمبر تر دریمې نیټې پورې به د نورډ سټریم ۱ پایپ لاین څخه آلمان ته د ګازو جریان ودروي.
 
د نورډ سټریم ۱ آپریټر ویب پاڼې په وینا، د ګاز جریان د ټاکل شوي وخت څخه یو ساعت دمخه خورا کم شوی او د چهارشنبه له لومړیو ساعتونو راهیسې په بشپړ ډول بند شوی دی.
 
د روسیې د ګازپروم شرکت اعلان کړی چې په دې پایپ لاین کې د وروستي پاتې کمپرسور د ترمیم لپاره د ګاز جریان قطع کول اړین وو.
 
دې مسلې د مسکو او بروکسل تر منځ اقتصادي شخړه لاپسې زیاته کړې ده او په دې توګه د اروپا په ځینو بډایه سیمو کې د انرژی د کمښت او راشنینګ امکان لا زیات شوی دی.
 
اروپايي حکومتونه ویره لري چې روسیه به په اوکراین د دې هیواد له برید وروسته د لګول شویو بندیزونو په غچ کې د ګازو کمول نور هم اوږد کړي.
 
اروپايي ټولنې د روسیې ولسمشر تورن کړی چې له انرژۍ څخه د وسلې په توګه کار اخلي، خو مسکو دا تور رد کړی دی.
 
اروپا ته د ګازو د رسولو نور محدودول به په دې وچه کې د انرژۍ بحران لاپسې زیات کړي. د ګازو عمده پلور بیه د تیر کال د اګست په پرتله ۴۰۰ سلنه لوړه شوې او د مصرف کونکو او سوداګرۍ لپاره د ژوند بیه لوړه شوې او اروپایي حکومتونه د فشار کمولو لپاره ملیاردونه ډالر مصرفوي.
 
مسکو په جون کې د نورډ سټریم پایپ لاین له لارې اروپا ته د ګازو رسول په جون کې ۴۰ سلنه او په جولای کې ۲۰ سلنه کم کړل، د ساتنې ستونزې یې په ګوته کړې. د روسیې په وینا، بندیزونو د تجهیزاتو د بیرته راستنېدو او نصبولو مخه نیولې ده.
 
روسیې پر اوکراین د برید او د اروپايي هېوادونو له خوا پر مسکو د بندیزونو له پیلېدو راهیسې بلغاریا، ډنمارک، فنلنډ، هالنډ او پولنډ ته د ګازو رسول په بشپړه توګه بند کړي او له نورو پایپ لاینونو یې د ګازو جریان کم کړی دی.
 
د آلمان د اقتصاد وزیر رابرټ هوبیک یو ماموریت لري چې د ۲۰۲۴ تر نیمایي پورې د روسیې د ګازو وارداتو لپاره بدیل ومومي. هغه د دې میاشتې په پیل کې اعلان وکړ چې د نورډ سټریم پایپ لاین په بشپړ ډول فعال دی او هیڅ تخنیکي ستونزه شتون نلري لکه څنګه چې روسیه ادعا کوي.
 
سره له دې چې آلمان په اروپا کې د ستر اقتصاد په توګه د خپلو ګازو د زیرمو په ډکولو کې ښه پرمختګ کړی دی، خو دغه زیرمې د راتلونکي ژمي لپاره کافي نه دي. د نورډ سټریم ۱ پایپ لاین څخه د ګاز بندیدل د اروپا د ګازو زیرمو د ډکولو هڅې پیچلې کوي.