د بلخ د کرنې ریاست چارواکي په دغه ولایت کې د انګورو په حاصلاتو کې لس سلنه زیاتوالی ښيي او وايي چې سږ کال به اووه زره ټنه انګور حاصل کړي.

آوا - مزار شریف: محمد حسین عظیمی؛ د بلخ د کرنې او اوبو لګولو رياست د کرنې د پراختيا رييس نن دوشنبه (سنبله ۷) آوا ته وويل: په بلخ کې ۳۴۲۰ هکتاره ځمکه د انګورو باغونه لري، چې سږ کال يې حاصلات اووه زره ټنه اټکل شوي دي.
 
د هغه په ​​وينا، تېر کال په بلخ کې له ۲۵ هکتاره ځمکې څخه شپږ زره ټنه انګور ترلاسه شوي وو، چې سږ کال د تېر کال په پرتله لس سلنه زياتوالى ښيي.
 
عظيمي زياته کړه، د بلخ د انګورو ډېر باغونه په شولګر، دهدادي، چمتال او دولت اباد ولسواليو کې دي او د بلخ انګور ښه کيفيت لري.
 
په همدې حال کې د بلخ باغ لرونکي د انګورو د حاصلاتو له ډېرېدو خوښ دي. خو دوی وايي چې د تېر کال په پرتله يې کچه راټيټه شوې ده.
 
د بلخ د کرنې ریاست هم د تېر کال په پرتله د انګورو د بیې د راټیټېدو پخلی کوي او وايي، کله چې حاصلات ډېر شي او ډېر شي، د انګورو بیه به راټیټه شي.
 
د بلخ د کرنې رياست د کرنې د ترويج رييس وويل: د تېر کال په پرتله د انګورو بيه راټيټه شوې او له باغدارانو مو وغوښتل چې خپل انګور په مميزو بدل کړي، څو په مناسبه بيه يې وپلوري.
 
دا په داسې حال کې ده، چې په تېرو کلونو کې په بلخ ولایت کې ۱۴۵ د ممیزو کورونه جوړ شوي دي.