د اسلامي امارت د ادارې عمومي ریاست په یوه ټویټ کې لیکلي چې د « وان یس تایناز» په نوم یوه چینايي کمپنۍ د افغانستان د کانونو استخراج ته چمتووالی ښودلی دی.

آوا - کابل: نورالحق انور؛ د دغې ادارې د همغږۍ مرستيال د وان یس تایناز شرکت له مسئولينو سره په کتنه کې په دغه قرارداد کې د ليکلي شرطونو غوښتنه وکړه.
 
انور؛ که څه هم د شرايطو د څرنګوالي په اړه څه ونه ويل، خو ټينګار يې وکړ، چې ياد شوي شرطونه به له اړوندو وزارتونو سره له شريکولو وروسته د قرارداد په اړه وروستۍ پرېکړه کوي.
 
په دغو ټويټونو کې ويل شوي چې ياده شوې کمپنۍ ماهر، تخنيکي او مسلکي کسان لري.
 
د تېر حکومت پر مهال د لوګر د مس عینک کان یوه چینايي کمپنۍ قرارداد کړی و، خو د جګړې د ناامنیو او د لرغونو اثارو د موندلو په ګډون د بېلابېلو لاملونو له امله د دغه کان کار ودرېد.
 
د يادونې وړ ده، چې له امريکا وروسته چين د نړۍ دويم اقتصادي هېواد دى، چې تل يې د نړۍ په کچه د خپلو پانګونو د پراختيا هڅه کړې او په افغانستان کې له سياسي پرمختګونو وروسته يې اقتصادي کچه هم لوړه شوې ده.