په بامیان پوهنتون کې د جعفري فقهې د څانګې له جوړېدو شپږ کاله تېر شول. خو په دې برخه کې ځينې محصلين وايي چې په دې وروستيو کې د جعفري فقهې تدريس بند شوى او حنفي فقه به تدريس کېږي. د بامیان پوهنتون رییس بیا وايي چې د جعفري فقهې څانګه لا هم فعاله ده او بدلون نه دی راغلی.

آوا - بامیان: کریم (مستعار نوم)؛ د باميان پوهنتون د جعفري فقهې د څانګې يو محصل وايي چې درې کاله يې په دغه پوهنتون کې د جعفري فقهې زده کړې او د څلورم کال په پيل کې د جعفري فقهې تدريس بند شو او پر ځای يې حنفي فقه تدريس شوه.
 
هغه آوا ته وویل، "موږ له حنفي فقهي سره کومه ستونزه نلرو، خو د هغه میدان ته د ناڅاپه ننوتلو او په هغه ډګر کې چې موږ درې کاله زده کړې کړې دي، زموږ لپاره کارونه ستونزمن کړي دي."
 
د دې څانګې یو شمېر محصلین وايي، په داسې حال کې چې ټاکل شوې وه د روان کال په پای کې د جعفري فقهې د څانګې د محصلینو دوهمه فراغت دوره ترسره شي، خو د بامیان پوهنتون د دغه پوهنځي د رییس له خوا د دغه پوهنځي د فعالیت مخه نیول شوې ده. شرعي.
 
په همدې حال کې په ١٣٩٧ کال کې د لوړو زده کړو وزارت له خوا د باميان پوهنتون رئيس ته په ٢٥٨٩ شمېره مکتوب لېږل شوى و، چې په کې د باميان پوهنتون له مسوولينو غوښتل شوي وو، چې په باميان پوهنتون کې د جعفري فقهې څانګه جوړه کړي.
 
د دې څانګې زده کوونکو تېر کال خپله لومړۍ فراغت ولمانځه. خو سږ کال د دې څانګې يو شمېر محصلين وايي، چې د باميانوپوهنتون د شرعياتو پوهنځي رييس په دغه پوهنځي کې د جعفري فقهې تدريس بند کړى دى.
 
د بامیان پوهنتون د رئیس ځواب
په همدې حال کې د بامیان پوهنتون مسوولین د جعفري فقهې د تدریس ځنډول ردوي او وايي چې د بامیان پوهنتون د تېرو کلونو نصاب تعقیبوي.
 
محمد سلیم فیضي؛ د بامیان پوهنتون رئیس آوا ته وویل: د بامیان په پوهنتون کې د تیرو کلونو په څیر اوس هم په هماغه طریقه تدریس کیږی او یوازینی بدلون چې په ټولو څانګو کې د اسلامی کلتور د زده کړې موضوع ده، څلورو کریدیټو ته لوړه شوې ده.

خو په دې برخه کې محصلين وايي، چې د باميان په پوهنتون کې د جعفري فقهې تدريس تقريباً بند شوى او له اسلامي امارت څخه غواړي، چې د شرعياتو په پوهنځي کې د جعفري فقهې تدريس بېرته پيل کړي.
 
خو ځینو سرچینو آوا ته تایید کړې چې د بامیان او دایکنډي په پوهنتونونو کې د جعفري فقهې د څانګې د فعالیت د بندولو په اړه د اسلامي امارت د لوړو زده کړو وزارت او د شرعیاتو د پوهنځي د رئیس له لوري کوم مکتوب او حکم نه دی راغلی، دا کار پخبل سري ډول ترسره شوي.