د بدخشان ولایت سیمه ییزو چارواکو د فیض اباد ښار د پاکولو په موخه د ولسي پاڅون اعلان کړی او ویلي یې دي چې دغه پروګرام به لس ورځې دوام وکړي.

آوا - مزارشریف: د بدخشان د اطلاعاتو او فرهنګ رئیس معاذ الدین احمدي په دې اړه آوا ته وویل: د فیض آباد ښار د عامه پاکونې کمپاین نن یکشنبه د غبرګولي ۲۲ مه د دولتي ادارو د مسوولینو او کارکوونکو په حضور کې پیل شو او لس ورځې به دوام وکړي.
 
د هغه په ​​وينا، دغه پروګرام د چاپېريال ساتنې رياست او د فيض اباد ښاروالۍ له خوا د چاپېريال ساتنې اونۍ په مناسبت پيل شوى او ټول ښار به له کثافاتو پاک شي.
 
دغه پروګرام په داسې حال کې پيل شو، چې د فيض اباد ښاريانو تر دې وړاندې په ښار کې د کثافاتو د توليد له زياتوالي څخه شکايت کاوه او له دولت څخه يې د ښار پاکوالي ته د جدي پاملرنې غوښتنه کوله.