د افغانستان ولسمشر محمد اشرف غني او ورسره مل پلاوي نن په دوحه کې د قطر له امیر شیخ تمیم حمدبن ال ثاني سره وکتل.

له ولسمشرۍ ماڼۍ په خپره شوې خبرپاڼه کې راغلي، دواړو لورو د افغانستان او قطر د اړیکو د لا پراختیا، اقتصادي همکاریو او سولې پروسې په اړه بحث او خبرې وکړې.
خبرپاڼه لیکي، د قطر امیر هیله څرګنده کړه چې د دواړو هیوادونو ګډې هلې ځلې په افغانستان کې د تلپاتې سولې او ثبات د تامین لامل شي.
د خبرپاڼې په خبره، نوموړي همدارنګه وویل، موږ ته دوه اړخیزې اړیکې او مناسبات ډېر مهم دي او د دې وخت را رسېدلی چې دواړه هیوادونه د دوه اړخیزه اړیکو، اقتصادي همکاریو، سوداګرۍ او فرصتونو په اړه بحث او خبرې وکړي او ګډ پلاوي به ورباندې عملا کار کوي.
د خبرپاڼې له مخې ولسمشرغني وویل:
 موږ چمتو یوو په هغو مسایلو چې د دواړو هیوادونو ترمنځ اړیکې او همکارۍ زیاتوي کار وکړو.
دا په داسې حال کې ده چې د افغانستان ولسمشر محمد اشرف غني د یو لوړپوړي دولتي پلاوي په مشرۍ په دوه ورځني سفر تېره ورځ لومړی کویټ او بیا قطر ته لاړ.