کد QR مطلبدریافت صفحه با کد QR

افغان حکومت د اروپايي ټولنې د اعلاميې هرکلی وکړ

17 سنبله 1399 ساعت 15:19

د افغانستان د بهرنيو چارو وزارت د اروپايي ټولنې او کاناډا د استازوليو له لوري د خپرې شوې اعلاميې هرکلی کړی او د سولې لپاره له رامنځته شوي فرصت يې د ګټه اخيستو ژمنه کړې.

د بهرنيو چارو وزارت ويلي، د افغان دولت او طالبانو ترمنځ د پیلېدونکو خبرو په تړاو، افغان دولت په کابل کې د اروپايي اتحادیې او کاناډا د ډیپلوماټیکو استازولیو د مشرانو د اعلامیې هرکلی کوي.



د دغه وزارت له لوري په خپره شوې خبرپاڼه کې راغلي:

((د اروپايي ټولنې او کاناډا استازوليو اعلامیه هغه تاریخي فرصت په ګوته کوي چې د دې خبرو په نتیجه کې به رامنځته شي. د افغانستان اسلامي جمهوریت  بشپړ چمتو دی چې د دې فرصت څخه په استفادې سره، د مذاکرې له لارې تاوتریخوالي ته د پای ټکی کیږدي.))

 په خبرپاڼه کې زياته شوې، افغان دولت به په دې مذاکراتو کې د ښه نیت په درلودلو سربېره له یوې جوړوونکې ارادې سره ګډون وکړي.

په خبرپاڼه کې زياته شوې:

((د دې ښه نیت د تمثیلولو یوه واضحه بیلګه د طالب زندانیانو آزادول وو. هغه څه چې افغان دولت یې ژمنه نه وه کړې او په یاده اعلامیه کې  یې هم د باور رامنځ ته کولو د ښې بېلګې په توګه یادونه شوې ده.))

په خبرپاڼه کې راغلي، افغان دولت یو ځل بیا له طالبانو څخه د اوربند او تاوتریخوالي د کمولو په برخه کې د بِالمثل چلند هیله کوي.

د خبرپاڼې په حواله، افغان دولت د سولې په موخه خپل لیدلوری، چې پکې د ټولو افغانانو، نارینه وو او مېرمنو بنسټیز حقونه خوندي وي، په ډاګه کوي.

دا په داسې حال کې ده چې پرون د اروپايي ټولنې او کاناډا استازوليو يوه اعلاميه خپره کړه او د جګړې له دواړو اړخونو يې غوښتنه وکړي چې د سولې لپاره له رامنځته شوي فرصت ګټه واخلي.

 


د مطلب کود: 218355

دمطلب پته :
https://www.avapress.com/ps/news/218355/افغان-حکومت-د-اروپايي-ټولنې-اعلاميې-هرکلی-وکړ

آوا
  https://www.avapress.com