د افغانستان کورنی شپږيزه کرېکټ ليګ پيل شي. دغه ليګ به نن له غرمې وروسته د بندامير ښامارانو او مس عينک اتلانو په لوبې سره پيل شي.
تېره شپه د دغه ليګ پرانيستونکي مراسم ترسره شول چې ولسمشر محمد اشرف غني او د ولسمشر لومړي مرستيال امرالله صالح هم پکې ګډون کړی وو.
دا د شپږيزه کرېکټ ليګ اووم فصل دی چې شپږ لوبډلې بندامير ښاماران، مس عينک اتلان، سپين غر زمريان، بست ساتونکي، امو نهنګان او کابل بازان پکې برخه لري.
د شپږيزې کرېکټ ليګ اووم پړاو نن د سپټمبر په ۶مه پيلېږي او د ۱۱ ورځو لپاره د سپټمبر تر ۱۷مې نېټې دوام کوي.

دغه ليګ کې سږ کال د افغان کرېکټ درې مخکښ لوبغاړي راشدخان، محمدنبي او مجيب الرحمن په نورو نړيوالو ليګونو کې د بوختیاوو له کبله نه لوبېږي او درې نور نجيب‌الله ځدراڼ، ظاهرخان او نوين‌الحق بيا وروستيو لوبو ته را رسېږي. دوی شپږ واړه دا مهال د ويسټ انډيز په غوره ليګ په لوبو بوخت دي.