د افغانستان د مشرانو جرګې د شکايتونو کمېسيون د افغانستان بانک سرپرست اجمل احمدي لويې څارنوالۍ ته معرفي کړ.
د مشرانو جرګې د شکايتونو کمېسيون غړی زلمی زابلی وايي، د اجمل احمدي له لوري په دې بانک کې د غيرقانوني ادلون بدلون په تړاو ورته ګڼ شکايتونه رسېدلي دي.

د زابلي په خبره، له همدې کبله ياد کمېسيون پرېکړه وکړه چې دغه قضيه دې لويه څارنوالي په اساسي ډول وڅېړي.
اجمل احمدي چې تر دې وړاندې د افغانستان د صنعت او سوداګرۍ وزير و، د افغانستان بانک د سرپرست په توګه تر ټاکل کېدو وروسته يې د دې بانک يو شمېر چارواکي پر فساد تورن او له دندو ګوښه کړل.
دې چارې پر ټولنيزو رسنيو هم يو شمېر غبرګونونه راوپارول.