له افغانستان څخه د ۴۰۰۰ امریکایي سرتېرو د وتلو طرحه مخ پر بشپړیدو ده

د دغو سرتېرو له ایستو سره به په افغانستان کې ۴۵۰۰ امریکایي سرتېرې پاتې شي، چې دا به په ۲۰۰۱ کال کې پر افغانستان د امریکا د برید له مهاله تر ټولو ټیټ شمېر وي.
دغه هڅه له افغانستان څخه د امریکایي ځواکونو پوره وتلو ته لار اواروي.
که څه هم د روان کال په فبرورۍ کې د طالبانو او امریکایانو تر منځ د سولې ټینګیدو هوکړه لاسلیک شوې؛ خو سره له دې هم په افغانستان کې جګړه روانه ساتل شوې او ښکېل لوري هره ورځ بریدونه کوي او عام ولس ته مرګ و ژوبله اړوي.
سره له دې، چې له افغانستان څخه د امریکایي ځواکونو وتل وروستي شوي ندي؛ خو د امریکا دفاع وزیر مارک ایسپر تېره اوونۍ له ناټو سره پرې خبرې کړې دي.
دغه راز په دې اړه د امریکا د ملي امنیت پخواني سلاکار جان بولتن په خپل تازه خپور شوي کتاب کې لیکلي، چې د امریکا ولسمشر په افغانستان کې د امریکایي ځواکونو پر تلپاتي شتون خوښ ندی.
هغه په افغانستان کې د امریکایي سرتېرو پر شتون د ترمپ د ناخوشۍ علتونه ټاکنیزې وعدې او په دې هېواد کې د اقتصادي او امنیتي مرستو ناسم مدیریت یاد کړی دی.