له ای این آی هندي ټلویزیون سره په مرکه کې ښاغلي مودي ویلي چې په پاکستان به فشار ته دوام ورکړي، هغه زیاته کړې چې د ترهگرۍ د مخنیوي لپاره دغه فشار که په پاکستان کې دننه د ترهگرو په نښه کول وي او که یا په بل ډول وي.

د هند لومړی وزیر پر خپل ټویټر لیکي، دا خیال او فکر سم نه دی چې پاکستان به له یوې جګړې سره اصلاح شي، هغه زیاتوي د پاکستان اصلاح وخت غواړي او دغه کار ژر نشي ترسره  کیدلای.
نرېندر مودي په ټوېټ کې زیاتوي چې د “ترهګرۍ” د ملاتړ له کبله پاکستان ګوښه شوی دی.
مودي ویلي چې هند هیله من دی چې له گاونډي هیواد پاکستان سره ښې اړیکې ولري خو زیاته کړې یې ده  چې پاکستان د ترهگرۍ نه لاس نه اخلي او په خپل چلند کې بدلون نه راولي. هندي چارواکي پر پاکستان تور لګوي چې په خاوره کې یې د دوی ضد وسله والو ته پټنځایونه  او روزنځایونه تیار کړي دي.