د لغمان ولایت په دولت شاه ولسوالی کې تېره شپه د امنیتي او دفاعي ځواکونو په یوه کمین کې د وسله والو طالبانو څلور مهم غړي ووژل شول.

د افغانستان د کورنیو چارو وزارت په یوه بیان کې ویلي، چې دا کسان چې مولوي جنت ګل، قاري ذبیح الله، قاري مطیع الله او ملا محمد نبي نومېږي، تېره شپه د پولیسو ځواکونه د یوه کمین په پایله کې د لغمان ولایت په دولت شاه ولسوالۍ کې وژل شوي او یو بل تن یې د ملا محمود په نامه ټپي شوی دی.
 خبرپاڼه زیاتوي، چې د دواړو لورو په نښته کې پولیسو ته کوم زیان نه دی رسېدلی.
د وسله والو طالبانو په ګډون د دولت ضد وسله والې ډلې تر اوسه په دې اړه څه نه دي ویلي.
لغمان د افغانستان په ختېځ کې يو له نسبتاً ارامو ولايتونو څخه دی، خو بيا هم کله ناکله په کې د تاوتريخوالي خبرونه ورکول کېږي .
د لغمان ولایت په یو شمېر لرو پرتو سیمو او ولسوالیو کې یې د وسله والو طالبانو ترڅنګ د اسلامي دولت نومې ډلې پلویان هم فعالیت لري.