هلمند ولایت کې افغان ځواکونه تیره شپه د زمری په ۱۵ مه نیټه ځانګړو عملیاتو القاعده یو لوړپوړۍ چارواکې وژلی دی.

د افغانستان د ځانګړو ځواکونو د قول اردو ویاند عبدالقیوم نورستاني په دی اړه ویلي، چې د بګرام د ټیم ځانګړو ځواکونو د دوشنبې په شپه د هلمند ولایت د ګرمسیر په ولسوالۍ کې د القاعده د ډلې د یو لوړپوړې غړي عبدالرحیم المصري د نیولو لپاره عملیات وکړل.
ښاغلي نورستاني وویل، د ځانګړو ځواکونو په عملیاتو کې المصري او د هغه شپږ نور ملګري ووژل شول.
ښاغلي نورستاني وویل " المصري د القاعده ډلې یو لوړپوړی غړی وو، چې په هلمند او ټول افغانستان کې یې د دغې ډلې د امرونو د پلي کیدو مسولیت پر غاړه وو".
د ځانګړو ځواکونو د قول اردو له خوا په یوه خپره شوې اعلامیه کې ویل شوي، چې د هلمند ولایت د ګرمسیر په ولسوالۍ کې د دغو شپنیو عملیاتو په ترڅ کې ځانګړو ځواکونو دوه ښځې، چې پاکستاني اتباع ښودل شوي هم نیولي دي.
د ځانګړو ځواکونو قول اردو ویلي، چې په دې عملیاتو کې یوه اندازه وسلې، اسناد، ۸ کمپوټره، ۲۱ هارد ډیسک او د ماین د جوړولو یولارښود هم دغو ځواکونو ته په لاس ورغلی دی.
د القاعدې ډلې هم د افغان ځانګړو ځواکونو د ادعا په اړه تراوسه غبرګون نه دی ښودلی.