عبدالله عبدالله نن له سفيرانو او د بهرنیو هېوادونو له استازو سره د مخدره موادو پر وړاندې د مبارزې لپاره د نړيوالو مرستو د جلب په خاطر جوړې شوې غونډه کې وويل چې مخدره مواد او ترورېزم مستقيم تړاو سره لري.
ده وويل چې د مخدره موادو د تولید او پروسس پر فابريکو هوايي حملې اغېزمنې ثابتې شوي او د ترورېستي ډلو د تمويل سرچينې یې کمې کړې دي.
اجرائیه رئیس زیاته کړه، د افغانستان د جګړې د تمويل له ۴۰ څخه تر ۶۰ فیصده پورې منابع مخدره مواد دي.
ده وویل چې مخدره مواد د نړۍ د ټولو هېوادونو لپاره لوی خطر دی، خو ځينو هېوادونو افغانستان په دې برخه کې ډېر مسئول ګڼلی دی، خو ټول هېوادونه باید په دې برخه کې خپل مسئوليت تر سره کړي.