عطا محمد نور، چې ځان د بلخ برحاله والي ګڼي وايي؛ که یې کابل د اجراتو مخه ونیسي، د مامورینو معاشونه به د حیرتانو له عوایدو اجرا شي.
عطا محمد نور په بلخ کې یو ځل بیا په ډاګه کړه، چې ارګ ته د جمعیت لخوا د سپارل شوي سند عملي کیدل غواړي.
ده وویل، چې د ارګ او جمعیت تر منځ د سپارل شویو سپارښتنو د هوکړې تر وخته پورې د بلخ برحاله والي دی او هیڅوک یې مخه نه شي نیولی.
د سیمه ییزو ارګانونو خپلواکه اداره وايي، چې عطا محمد نور له دندې ګوښه شوی او اجرات یې قانوني ندي.
نور د سیمه ییزو ارګانونو خپلواکې ادارې ته خبرداری ورکوي، چې په لویو سیاسي مسایلو کې دې نه غږیږي.
شاوخوا یوه میاشت مخکې ولسمشر د بلخ د پخواني والي عطا محمد نور استعفا لاسلیک کړه او انجنیر داوود یې د بلخ د نوي والي په توګه وټاکه؛ خو ښاغلی داوود تر اوسه په کابل کې دی. حکومتي سرچینې که څه هم د انجنیر داوود د معرفي کیدو مشخصه نېټه نه اعلانوي؛ خو له یوې میاشتې راهیسې وايي، چې د ناندیو له پای ته رسیدو سره سم به نوی والي معرفي شي.