د افغانستان په سویل هلمند ولایت کې سیمه ییز چارواکي وایي، د افغان او بهرنیو ځواکونو د هوایي بریدونو په ترڅ کې ګڼ شمېر وسله والو ته مرګ ژوبله اړولې ده.
په سویل کې د ۲۱۵ میوند قول اردو قومانداني ویاند نواب ځدران وایي، د لښکرګاه ښار په اوږدو او ناوې ولسوالی په اړوند سیمو کې د هوایي بریدونو او ځمکني عملیاتو په ترڅ کې لږ تر لږه ۲۱ تنه وسله وال وژل شوي.
نومړې زیاته کړه، چې تیره شپه ناوخته د لښکرګاه ښار اړوند په بولان سیمه کې افغان هوایي ځواکونه هوایي بریدونه ترسره کړل چې په ترڅ کې ۶ تنه وسله وال ووژل شول او ۷ نور ټپیان شول.
د جنرال ځدران په وینا، د یوه بل هوایي برید په ترڅ کې چې امریکایي ځواکونو له خوا د ناوې ولسوالی په اړوند سیمه کې لږ تر لږه ۷ تنه وسله وال ووژل شول.
په همدې حال کې یوه بل امنیتي سرچینه وایي، د ملي پولیسو عملیاتو په ترڅ کې د هلمند-کندهار لویه لاره په اوږدو کې لږ تر لږه ۸ تنه وسله وال ووژل شول او ۱۲ نور ټپیان شوي دي.
د دولت ضد وسله والې ډلې تر اوسه په دې اړه څه نه دي ویلي.