د وسله والو طالبانو ویاند ذبیح الله مجاهد د امنیتي ځواکونو د عملیاتو په ترڅ کې په شمال فاریاب ولایت کې سخت ټپي شوی.
په شمال کې ۲۰۹ شاهین قول اردو وایي، د طالبانو ویاند د فاریاب ولایت په غورماچ ولسوالی کې د عملیاتو پر مهال ټپي شوی دی.
د شاهین قول اردو قوماندان جنرال امان الله مبین د ذبیح الله مجاهد د ټپي کېدو په اړه راپورونه هم ټائید وکړ.
نوموړې وویل چې د وسله والو طالبانو پر وړاندې هوایي او ځمکني بریدونه د هېواد په شمال او شمال ختیځ ولایتونو لا هم دوام لري.
د طالبانو ډلې تر اوسه د ذبیح الله مجاهد په هکله د راپورونو په اړه څه نه دي ویلي.
دا لومړی ځل نه ده چې د ذبیح الله مجاهد په اړه راپورونه خپاره کیږي.
له دې وړاندې هم څو کاله مخکې داسې راپورونه خپاره شول چې ګواکې د وسله والو طالبانو ویاند ذبیح الله مړ شوی او یا هم د امنیتي ځواکونو له خوا نیول شوی دی.
سرچینه: خامه پرس