د افغانستان د اسلامي جمهوریت جمهوررئیس محمد اشرف غني نن ماسپښین بروکسل ښار کې د “ځواکمنې ښځې او آباد افغانستان” په نامه ناسته کې ګډون وکړ.

په دغه ناسته کې د هېواد لومړۍ میرمن، وزیرانو، چارواکو او د هېواد د ښځو په استازیتوب یو شمېر ښځو حضور درلود، په پیل کې د اروپايي اتحاديې د بهرني سیاست مسوولې او مرستیالې میرمن فیدریکا موګریني خبرې وکړې، جمهوررئیس او ورسره پلاوي ته یې د ښه راغلاست ترڅنګ وویل، نننۍ ناسته یوازې د افغانو ښځو په ځواکمنۍ نه راڅرخي، بلکې په دې ناسته کې د افغانستان د ټولو خلکو په اړه خبرې کېږي.
ورپسې جمهوررئیس غني د افغانستان د ښځو د لاسته راوړنو او ننګونو په اړه خبرې وکړې وې ویل: افغانې ښځې له وابستګۍ څخه د کور لپاره د نفقې په ګټونکو بدلې شوې دي او زه د هغوی زړورتیا ستایم.

جمهوررئیس زیاته کړه: افغانو ښځو پنځلسو کالو کې اوږده لار وهلې ده، هغوی د ځان په استازیتوب خبرې کولی شي، نورو ته چې د دوی په استازیتوب خبرې وکړي اړتیا نه لري. هغه څرګنده کړه، افغانې ښځې اوس کولی شي د ځان په استازیتوب په یو لیدلوري او ژمنې سره څرګندې خبرې وکړي.

محمد اشرف غني وویل: افغانې ښځې د ژوند په هر ډګر کې فعال حضور لري، هغوی د وزیرانو، معینانو، کروندګرو او متشبثینو په توګه فعالیت کوي.

جمهوررئیس څرګنده کړه: زه هیله مند یم، زما اړیکې د جمهوررئیس په توګه د هېواد لومړۍ میرمنې سره د ټولو لپاره د متقابل درناوي د الهام بېلګه اوسي.

جمهوررئیس غني وویل: افغانو ښځو چې د هېواد اساسي قانون په رڼا کې کومې لاسته راوړنې ترلاسه کړي دي، د معاملې وړ نه دي.

هغه وویل، ښځې به د ولسواکو ارزښتونو ساتونکي وي، هغوی به خپلې لاسته راوړنې وساتي، هغه به پراخې کړي او شاته تګ به ونه کړي.

جمهوررئیس غني وویل: موږ نشو کولی خپل بریالیتوب په هغو یو شمېر ښځو سره چې حکومتي مقامونو کې فعالیت لري اندازه کړو.

جمهوررئیس زیاته کړه: موږ باید خپلې هڅې د میلیونونو نجونو په واقعي ځواکمنتیا چې هلکانو سره ورته فرصت ته اړتیا لري اندازه کړو، ځکه دا موضوع زموږ هېواد سوکالۍ او آبادۍ خواته بیايي.

جمهوررئیس د ښځو پر وړاندې د ننګونو په اړه وویل: یوه ننګونه په حکومت کې حاکم فرهنګ دی، زه کولی شم په ټولو پوستونو باندې ښځې وګمارم، ما دا کار کړی دی، خو کوم غبرګون چې د هغوی په هکله ښودل کېږي، په حقیقت کې د یو همکار پر وړاندې د بل همکار غبرګون نه دی. هغه زیاته کړه: زموږ ټولو په وجود کې نر محوره فرهنګ شته او ښځو ته هرکلی نه ویل کېږي.

جمهوررئیس څرګنده کړه: موږ باید په اساسي توګه بازارونو ته د ښځینه تولیداتو د لاسرسي په اړه فکر وکړو.

محمداشرف غني د ښځو زده کړې ته په اشارې وویل، د کمیت له پلوه زموږ ښوونیز سیستم کې د پام وړ ښه والی راغلی دی، خو د کیفیت له پلوه یې ښه پرمختګ نه دی کړی.

جمهوررئیس وویل: په دې اړه چې نجونې ولي په ځانګړي عمر کې ښوونځي ته ځي او بیا په سیستماتیکه بڼه له زده کړو محرومېږي، جدي پاملرنه نه ده شوې. هغه ټینګار وکړ د ښځو د پرمختګ کومې لارې چې تړل شوي دي باید بېرته پرانیستل شي.

جمهوررئیس وویل، افغانې ښځې خیرات ته اړتیا نه لري، ځکه خیرات هغوی نشي ځواکمنولی، خو که د هغوی تولیدات او محصولات مارکیټ ته لاسرسی ولري دا کولی شي هغوی ځواکمنۍ کړي.

محمد اشرف غني وویل: نن چې کوم تولیدات په ۴۰ډالره خرڅېږي هغو مو په ۴۰۰ډالره خرڅولی شوای، نو موږ ته مارکیټونو ته لاسرسی مهم دی.

جمهوررئیس د خپلو خبرو په پای کې وویل، زه هیله مند یم چې ښځې کولای شي هر ډول خنډونه له خپلې مخې لري کړي او لا زیات پرمختګونه وکړي.

ستاسو نظر

مربوطه لیکنې

تازه ترین خبرونه