سیمه ییز چارواکي وايي، د نورستان په کامدیش ولسوالۍ کې د ملي اردو او وسله والو طالبانو ترمنځ جګړه لا هم روانه ده چې ګڼشمېر وسله والو مخالفینو ته په کې مرګژوبله اوښتې ده.
د ملي اردو د دوه سوه او لومړي سیلاب قول اردو د دویمې لوا ویاند محمدهارون یوسفزي ازادي راډیو ته وویل؛ د ملي اردو په پوستو باندې د وسله والو طالبانو له حملو وروسته دا جګړه پيل شوې ده.
یوسفزی وایي، تر دې دمه له دې جګړې نه چې د نن سهار له اته نیمو بجو پيل شوې؛ د اتو وسله والو طالبانو جسدونه په سیمه کې پراته دي.
یوسفزی زیاتوي، په دې جګړه کې تر دې دمه د ملي اردو دوه سرتیري وژل شوي او درې نور ټپيان دي.