افغان ملي امنیت د شکنجې په اړه د بشر د حقونو وروستی راپور رد کړ

د افغانستان د ملي امنیت عمومي ریاست د بشر د حقونو د کابل د دفتر هغه راپور رد کړ؛ چې وايي، په تخار ولایت کې د زده کوونکو د مسمومیدو د پیښو په ارتباط له نیولو شویو تورنو کسانو څخه په شکنجې سره اعتراف اخیستل شوی دی.

ځینو رسنیو د بشر د حقونو د کابل د دفتر د مسوول ″جیمز رادهور″ له قوله وویل، داسې شواهد نشته چې وښيي په تخار کې د یوه ښوونځي نجونې زده کوونکې دې مسومې شوي وي او په دې ارتباط له نیول شویو کسانو په زور اعترافات اخیستل شوي.

د ملي امنیت عمومي ریاست د نوموړي دغه څرګندونې بې اساسه او د افغان امنیتي ځواکونو پرضد یوه رواني جګړه بللې.

د راپورونو له مخې په دې وروستیو کې په تخار، فاریاب، بامیان او جوزجان په ګډون په یو شمیر ولایتونو کې په سلګونو نجونې زده کوونکې مسمومې شوي دي.