پوسټ کوډ 219690
نیټه خپرول: پنج شنبه 23 سلواغه 139911:31

خوست کې ۲۸۷ پروژې ګټې اخيستنې ته وسپارل شوې

په خوست کې د کليو پرمختيا او بيارغونې وزارت لخوا ۲۸۷ بېلابېلې پروژې بشپړې او ګټې اخيستنې ته وسپارل شوې.

مسولين وايي په دې پروژو کې ۴۵ د ښوونځيو ودانۍ او ۲۴۲ نورې پروژې دي، چې اسفالټ او کانکريټي سړکونه، کانالونه، پلونه، پلچکونه، کاريزونه، د اوبو زخيروي بندونه، سربندونه، لمريزه برېښنا او استنادي دېوالونه پکې شامل دي.

د پروژو د پرانيستې په مراسمو کې د کليو پرمختيا او بيارغونې وزير مجيب الرحمن کريمي، د پوهنې وزيرې رنګينه حميدي او ځينو نورو چارواکو ګډون کړی و.

والي جنرال مهمند کټوازی وويل چې په خوست کې زيات کاري فرصتونه شته او د دې ولايت اوسېدونکي او ولايتي اداره له هرې ادارې سره، چې په دې ولايت کې فعاليت کوي، پوره همکار دي.

کټوازی وايي چې د ادارې اصلاحاتو او له فساد او غصب سره يې مبارزه پياوړې کړې او د خلکو د ګټو په پام کې نيولو به چارې تر سره کيږي.

په ولسي جرګه کې د خوست استازو، د ولايتي شورا غړو، قومي مشرانو او ځوانانو په غونډه کې د خبرو پر مهال د دې ولايت د بوديجې، د ښوونکو د کموالي او تدريسي بهير، د ښوونکي پر ښارګوټي، متوازنې پرمختيا او اړوندو ځينو نورو برخو کې ستونزې، اړتياوې او وړانديزونه شريک کړل او له اړوندو ادارو يې د حل غوښتنه وکړه.

د کليو پرمختيا او بيارغونې وزير مجيب الرحمن کريمي وويل چې د ښوونځيو د ودانيو پر جوړېدو ۲۰۲ ميليونه او پر نورو بشپړو شويو پروژو ۷۵۹ ميليونه افغانۍ لګښت راغلی دی.

کريمي وايي چې په دې ولايت کې د ۸۰۶ میليونه افغانيو په ارزښت ۳۳۸ نورې بېلابېلې پروژې تر کار لاندې دي، چې شاوخوا ۷۰ زره تنو ته پکې د کار زمينه برابره شوې ده.

نوموړي زياته کړه: «په خوست کې به ۳۰ زره بې ځايه شويو يا راستنو شويو کډوالو ته د ۲.۵ ميليونه ډالرو په ارزښت د کارموندنې برنامه پيل شي. موږ هڅه کوو چې موسی خېلو، سپېرې او قلندر ولسواليو ته، چې کم انکشاف يې کړی، په راتلونکو برنامو کې زيات ځای ورکړو.»

د پوهنې وزيرې رنګينه حميدي وويل چې د پوهنې حالت ښه لوري ته روان دی او دوی په دې برخه کې د ځينو پلانونو پر پلې کېدو کار کوي.

حميدي د ۴۵ ښوونځيو د ودانيو جوړېدل ښه پرمختګ وباله او ويې ويل چې د پوهنې د کيفيت ښه کېدو لپاره به د ځينو نورو چارو تر سره کېدو سربېره حق الزحمه ښوونکي په رسمي ښوونکو بدل شي.

وزيره وايي: «د ښوونکو د کمبود ستونزه هم د يو مېکانېزم پر اساس حليږي او په ۷۵ ميليونه ډالرو د کتابونو چاپ هم روان دی چې ور سره به تر ډېره د تدريسي کتابونو کموالي نشت ستونزه هواره شي.»

وزيرانو تر وسه د خلکو ستونزو، اړتياوو او وړانديزونو ته د رسيدګي ژمنه وکړه او ويې ويل چې له دوی سره به د دوامداره اړيکو له لارې د مسايلو پر سمون کار کوي. په دې ولايت کې تېره اونۍ هم د شاوخوا ۶۰ ميليونه افغانيو په ارزښت بېلابېلې پروژې ګټې اخيستنې ته سپارل شوې وې.

ستاسو نظر

  • AvaAdvertisement

مربوطه لیکنې

تازه ترین خبرونه

  • AvaAdvertisement