پوسټ کوډ ۲۱۹۴۱۲
نیټه خپرول: شنبه ۱۸ سلواغه ۱۳۹۹ ۱۶:۰۶

سیمې ته د طالبانو د سفرونو دوام؛ ملا برادر ترکمنستان ته تللی

په قطر کې د طالبانو د سیاسي دفتر مشر ملا عبدالغني برادر د یو طالب پلاوي مشرۍ د ترکمنستان پلازمینې عشق اباد ته تللی دی. ټاکل شوې نوموړی د هغه هیواد له چارواکو سره وګوري.

په قطر کې د طالبانو د سیاسي دفتر ویاند ډاکتر محمد نعیم پرون جمعه ناوخته فبروري پنځمه (سلواغې ۱۷) پر خپل ټویټر پاڼه لیکلي چې ترکمنستان ته د ملا برادر سفر د هغه هیواد په رسمي بلنه تر سره کیږي.

 

نوموړي زیاته کړې چې ټاکل شوې دغه طالب پلاوی د ترکمنستان له چارواکو سره د افغانستان او ترکمنستان د اړیکو او سیاسي تحولاتو په اړه خبرې وکړي.

 

دا په شااوخوا دوو میاشتو کې د سیمې هیوادونو ته د طالبانو د سیاسي دفتر د استازو څلورم سفر دی. او په دغه موده کې یې پاکستان، ایران، روسیې او ترکمنستان ته سفرونه کړي دي.

 

د ترکمنستان هیواد تر دا مهاله هغه هیواد ته د طالب پلاوي د سفر په اړه تبصره نه ده کړې.

 

د سیمې هیوادونو ته د طالب استازو سفرونه پر داسې مهال تر سره کیږي چې د شااوخوا درې اونیو راپدېخوا د افغانستان د اسلامي جمهوریت او طالب استازو ترمنځ دوحه کې بین الافغاني مذاکرات درېدلي دي او دواړه لوري د مذاکراتو د اجنډا پر جوړولو او ترتیب نه دي توانېدلي.

 

پر همدې مهال د افغانستان د ملي مصالحې شورا د دوهم پړاو مذاکراتو د پیل پر ځنډېدو انتقاد کړی او ویلي دي چې طالب پلاوی د مذاکراتو پر ځای په سفرونو او «حاشیه ای بحثونو» مصروف دی.

 

د مصالحې شورا مشر عبدالله عبدالله د مذاکراتو نه پیلولو په اړه د طالبانو پلاوی په بهانه جوړولو تورن کړی او زیاته کړې ده چې د ددغه ډلې وسله والو په افغانستان کې تاوتریخوالی زیات کړی دی.

 

نوموړي زیاته کړې:"په دې باور یو چې د افغانستان قضیه لومړی په افغانانو پوري اړه لري او موږ باید د جګړې پای ته رسېدو او ورور وژنې په اړه له یو بل سره کښینو، د اسلام مبارک دین د لارښوونې او دیني ارشاداتو په اساس او نړیوالو عرف او قوانینو او د هیواد د لویو ګټو په نظر کې نیولو سره خپل ستونزه یو سیاسي حل ته د رسېدو په هدف هواره کړو."

 

د مصالحې شورا رئیس په دوحه کې د سولې مذاکرات د افغانستان د ستونزې هواري لپاره یو استثنايي فرصت بللی او زیاته یې کړې ده چې طالبان باید له دغه فرصت څخه ګټه واخلي.

 

د افغانستان د بهرنیو چارو وزارت تر دا مهاله ترکمنستان ته د طالب پلاوي د سفر په اړه تبصره نه ده کړې.

برچسب‌ها

ستاسو نظر

  • AvaAdvertisement

مربوطه لیکنې

تازه ترین خبرونه

  • AvaAdvertisement