ترکمنستان او افغانستان د اورګاډي پټلۍ، انټرنېټ او برېښنا پروژې پرانیستلې

ددغو پروژو پرانیست غونډې په دواړو هېوادونو کې د وېدیو کنفرانس له لارې وشوې، چې پیل کې یې د ترکمنستان ولسمشر قربانقلي بُردي محمددوف او وروسته افغان ولسمشر محمد اشرف غني ویناوې وکړې.

ښاغلي محمدوف وویل، د سیمه ییزې همکارۍ پام کې نیولو سره، "دا پروژې د افغانستان د ملاتړ او صنعت مهمه برخه ده، چې افغانستان به په خپلو پښو ودرېږي او ترکمنستان به له افغانستان سره خپلو اړیکو او همکارۍ ته دوام ورکړي".

نوموړي وویل، د هند، پاکستان، ترکمنستان او افغانستان د ګازو نللیکه، نوري فایبر، لاجورد لار، اورګاډي پټلۍ او د برېښنا پروژو پرانیستل د افغانستان او ترکمنستان ترمنځ د ښه ګاونډیتوب او همکارۍ ښکارندویي کوي.