پوسټ کوډ 217935
نیټه خپرول: چهارشنبه 24 مرغومی 139910:18

د پکتيکا ولايت سوداګر: پاکستان پر ډېورنډ فرضي کرښه راته ستونزې جوړوي

د پکتيکا ولايت سوداګر شکايت کوي چې پر ډېورنډ فرضي کرښه په انګور اډه کې يې پاکستانۍ غاړه دې هېواد ته د بېلابېلو توکو د صادراتو موټرونه په يوه او بله پلمه په ورځو، ورځو ځنډوي.

دوی وايي چې له دې امله يې مېوې او ځينې ژر خرابېدونکي توکي د خرابېدو له ګواښ سره مخ دي، چې دوی يې اندېښمن کړي دي.

د بار وړونکي موټر چلوونکی جمعه الدين وايي چې ياده ستونزه له څو ورځو راهيسې پيل شوې او د ټولې ورځې په جريان کې د ګوتو په شمار موټرونو ته پر کرښه د اوښتو يا رااوښتو اجازه ورکول کيږي.

نوموړي وويل: «د تجارانو مڼې او سبزي خرابيږي او يخ يې وهي، د دې مشکل د حل لپاره هيچا هم اقدام ندی کړی او تر اوسه هېڅ هم ندي شوي. مخکې به هره ورځ ډېر موټرونه تلل او راتلل، خو اوس ټول انتظار ولاړ وي.»

 

يو سوداګر زرين حليم ياده مسله جدي بولي او له چارواکو غواړي چې له اړوندو مسولينو سره په دې تړاو د ستونزې د حل لپاره خبرې وکړي.

حليم وويل چې په کور د ننه هم پر لويو لارو له ستونزو سره مخ وي او په بېلابېلو ځايونو کې ترې په غير قانوني ډول پيسې اخيستل کيږي او پر کرښه هم مالونو ته د اجازې نه ورکولو له امله ورته مالي زيانونه اوړي.

نوموړي زياته که: «دا اوس هم دواړو خواوو ته لسګونه موټرونه ولاړ دي، دا هر يو د هر ساعت په تېرېدو تاوان کوي او د له منځه تلو له خطر سره مخ دي.»

د بار وړونکو موټرونو د اتحاديې مشر سيدمحمد وايي د ستونزې پر لامل نه پوهيږي، خو د کرښې دواړو غاړو ته ګڼ موټرونه بند پاتې دي.

محمد شکايت کوي چې له يوې خوا د يادې لويې لارې خرابولي او له بلې خوا يې دا ډول ستونزې کړوي او سوداګرو ته مالي زيان اړوي.

نوموړي زیاته کړه: «د پاکستان لخوا خپلو مالونو وريژو، مالټو او نورو ته اجازه ورکول کيږي، خو د افغانستان مالونو ته له اوږده ځنډ سره هم د اوښتو اجازه نه ورکوي.»

د پکتيکا ولايت د سوداګرۍ او پانګونې خونې مسولين هم دا مسله اندېښموونکې بولي او وايي چې په دې اړه يې اړوندو ادارو ته خبر ورکړی، خو ستونزه تر اوسه نده حل شوې.

د پکتيکا ولايت مقام دا ستونزه مني او وايي چې د يادې ستونزې د حل پر لارو، چارو بوخت دي.

د والي وياند غازي دانش وويل چې دا مسله يې پر ياده سيمه کې پر کرښه د هاغې غاړې له مسولينو او د هېواد له نورو اړوندو مرکزي ادارو سره شريکه کړې او د حل ډاډ ورکړل شوی دی.

که څه هم د دواړو خواوو سوداګرو څو ځله له سياسي مسايلو د سوداګرۍ لرې ساتول او د سياسي فشار په توګه د سوداګرۍ نه استعمالولو غوښتنه کړې او پاکستان په دې اړه ژمنې کړې، خو د دې سربېره هم ياد هېواد ځينې وخت د ورته موخو لپاره پر کرښه سوداګرو ته ستونزې جوړوي.

ستاسو نظر

  • AvaAdvertisement

مربوطه لیکنې

تازه ترین خبرونه

  • AvaAdvertisement