پوسټ کوډ 205601
نیټه خپرول: پنج شنبه 6 لیندۍ 139916:12

له پاکستان سره د ټولو سوداګریزو خنډونو د لرې کولو هڅې کوو – سوداګرۍ وزارت

د افغانستان د سوداګرۍ او صنایعو وزارت ویلي، چې په تېرو څو اوونیو کې د افغانستان او پاکستان تر منځ د سوداګریزو اړیکو پر وړاندې یو شمېر خنډونه لرې شوي دي.

افغان چارواکي هیله من دي، چې له دې پرمختګ سره به پاکستان ته د افغانستان صادرات په راتلونکي کال کې دوه برابره شي.

د سوداګرۍ او صنایعو وزارت ویاند فواد احمدي ویلي؛ د سوداګرۍ او صنایعو وزارت د نثار احمد غوریاني په مشرۍ هڅه کوي، چې له پاکستان سره په سوداګریزو چارو کې د خصوصي سکتور ټول خنډونه له مخې لرې کړي.

د سوداګرۍ وزارت چارواکو زیاته کړې، چې یو افغان پلاوی به په نږدې راتلونکي کې له پاکستانیو چارواکو سره د سوداګریزو اړیکو په اړه د خبرو لپاره پاکستان ته سفر وکړي.

د افغانستان او پاکستان د سوداګرۍ او صنایعو د ګډې خونې مشر نقیب الله ساپي ویلي: د دواړو هېوادونو سوداګریز پلاوي په خپله وروستۍ ناسته کې هوکړه کړې، چې د دواړو هېوادونو د سوداګرو تر منځ ټولې ستونزې حل او د سوداګرۍ او اقتصادي اړیکو د پراخولو لپاره هڅې وکړي.

افغانستان او پاکستان د یو میلیارد دالرو پر ارزښت سوداګري لري؛ خو افغان چارواکي هیله من دي، چې راتلونکي کال به پاکستان ته د افغانستان صادرات ۴۰۰ میلیونه دالرو ته لوړ شي.

له دې مخکې د افغانستان او پاکستان ترمنځ سوداګري درې میلیارد دالرو پر ارزښت وه.

ستاسو نظر

  • AvaAdvertisement

مربوطه لیکنې

تازه ترین خبرونه

  • AvaAdvertisement