تعداد ۱۴ تن از زندانیان افغان که در توقیف خانه های تاجیکستان به سر میبردند بروز پنجشنبه ۲۶ ثور به مقامات افغان تسلیم داده شدند.
به گزارش دفتر مطبوعاتی وزارت امور خارجه، این زندانیان که به ارتکاب جرایم مختلف در زندان های جمهوری تاجیکستان حبس بودند، بر اساس موافقتنامه دو جانبه میان جمهوری اسلامی افغانستان و جمهوری تاجیکستان مبنی بر تبادله زندانیان، در حالیکه مسوول بخش قونسلی سفارت افغانستان در دوشنبه نیز حاضر بود، در مرز دو کشور به نماینده وزارت عدلیه جمهوری اسلامی افغانستان تسلیم داده شدند.
به استناد موافقتنامه استرداد مجرمین و محبوسین که در سال ۱۳۸۵ میان دوکشور به امضا رسیده است، تاکــنون حدود ۲۹ زندانی افغان و ۸ زندانی تاجیک در دو مرحله تبادله گردیده که باقی ایام حبس خود را در محابس کشور های خود سپری می نمایند.