پس از اظهارات نماینده ویژه روسیه مبنی بر این‌که دولت تاجیکستان تنها عضو مخالف ازسرگیری فعالیت گروه تماس سازمان همکاری شانگهای-افغانستان است؛ مقامات تاجیکستان با رد این موضوع گفته اند که این کشور مخالفتی با ازسرگیری گروه تماس سازمان همکاری شانگهای برای همکاری با افغانستان ندارد.

خبرگزاری صدای افغان(آوا)- سرویس بین الملل: تاجیکستان با رد اظهارات نماینده ویژه روسیه برای افغانستان گفت: دوشنبه هرگز با از سرگیری فعالیت گروه تماس سازمان همکاری شانگهای - افغانستان مخالف نبوده‌ایم.

هماهنگ کننده تاجیکستان در گفتگو با رسانه «آسیا پلس» و سازمان همکاری شانگهای تأکید کرد: در چارچوب سازمان همکاری شانگهای، تاجیکستان پیوسته بر ضرورت گفتگو در مورد مسائل افغانستان تاکید کرده است و هرگز با فعالیت‌های این گروه مخالفت نکرده است.

وی در ادامه خاطرنشان کرد که طرف تاجیکستان از جمله در نشست وزیران خارجه سازمان همکاری شانگهای، پیشنهاد کرده بود «بحث کارشناسی درباره مسائل افغانستان در قالب سازمان همکاری شانگهای آغاز شود.»

نماینده ویژه روسیه برای افغانستان پیش از این اعلام کرده بود که دولت تاجیکستان تنها عضو مخالف ازسرگیری فعالیت گروه تماس سازمان همکاری شانگهای-افغانستان است.


وی با اشاره به نشست اخیر وزرای خارجه کشورهای عضو سازمان همکاری‌های شانگهای در آستانه، گفت:کشورهای عضو سازمان همکاری شانگهای از ازسرگیری کارگروه سازمان همکاری شانگهای-افغانستان حمایت کردند، شرکای تاجیک ما هنوز ملاحظات خاصی دارند، اما امیدواریم که به‌زودی در موضع خود تجدیدنظر کنند.

بر اساس این گزارش، از زمان بازگشت امارت اسلامی به قدرت، این نخستین‌بار است که بحث حضور افغانستان در گفت‌وگوهای سازمان همکاری‌ شانگهای مطرح شده‌ است.