مقامات در دارالانشاء کمیسیون تماس با شخصیت‌های افغان می‌گویند که برای شمار دیگری از شخصیت‌های سیاسی و مقامات اداره حکومت پیشین کارت‌های مصونیت توزیع کرده‌اند.

خبرگزاری صدای افغان (آوا)-کابل: کمیسیون تماس با شخصیت‌های افغان به شماری از شخصیت‌های سیاسی و مقامات اداره پیشین کارت مصونیت توزیع کرده است.
 
دفتر مطبوعاتی معاونیت سیاسی ریاست الوزرا، در خبرنامه‌ای نوشته است: مولوی محمد ذاکر، رییس دارالانشاء کمیسیون تماس با شخصیت‌های افغان کارت‌های مصونیت را به شماری از شخصیت‌های سیاسی و مقامات اداره پیشین توزیع کرده است.
 
مولوی ذاکر بیان داشته است، شخصیت‌هایی که به بیرون از افغانستان رفته‌اند، می‌توانند با خاطر آسوده به کشور برگردند و «با عزت زندگی کنند و اگر نگرانی دارند، برای آنان کارت مصونیت داده می‌شود.»
 
در خبرنامه آمده است که این شخصیت‌ها از دریافت کارت‌های مصونیت ابراز خرسندی کرده و اطمینان دادند که آماده همکاری با امارت اسلامی هستند.
 
گفتنی است که تاکنون صدها شخصیت‌ سیاسی و مقامات اداره پیشین، از سوی کمیسیون تماس با شخصیت‌های افغان کارت مصونیت دریافت کرده‌اند.