رییس جمهور تاجیکستان روز گذشته (جمعه، 22 میزان) در نشست سران روسیه و کشورهای آسیای میانه طی سخنانی مدعی شد که فعالیت‌ گروه‌های تروریستی در افغانستان افزایش یافته است و هم‌اکنون بیش از 12 گروه تروریستی در خاک کشور مشغول به فعالیت هستند.

خبرگزاری صدای افغان (آوا): امام علی رحمان، رییس جمهور تاجیکستان دیروز جمعه (22 میزان) در نشست سران روسیه و کشورهای آسیای میانه گفت که او شاهد گسترش فعالیت شبه نظامیان در مرز با افغانستان است.

به نقل از خبرگزاری ریانووستی روسیه، رییس جمهور تاجیکستان افزوده است: "ما شاهد گسترش فعالیت گروه‌های مختلف تروریستی و افراطی در افغانستان هستیم."

او ادعا کرد که بیش از 12 گروه تروریستی در افغانستان حضور دارند.

گفتنی است که در این نشست رؤسای جمهور روسیه، قرقیزستان، ترکمنستان و ازبکستان حضور داشته‌اند.

این در حالی است که پیش از این امارت اسلامی هر ادعایی مبنی بر حضور گروه‌های تروریستی در افغانستان را رد و تاکید کرده است که افغانستان هیچگونه تهدیدی برای هیچ کشوری نخواهد بود.