کمیساریای عالی سازمان ملل متحد در امور مهاجرین از دولت تاجیکستان خواسته است تا مهاجرین افغان را اخراج نکند.

 خبرگزاری صدای افغان(آوا) – مانیتورینگ: به گزارش رسانه ها طی یک هفته گذشته 9 تن از پناهجویان افغانستانی از تاجیکستان اخراج شده اند.

بر اساس این گزارش، در میان اخراج شده ها کسانی نیز بودند که اسناد مهاجرت و پاسپورت نیز دراختیار داشتند.
 
کمیساریای عالی سازمان ملل متحد در امور مهاجرین نگرانی عمیق خود را از اخراج مهاجرین از تاجیکستان ابراز کرده و با انتشار اعلامیه یی گفته است که تاجیکستان با اخراج مهاجرین افغانستان٬ قوانین بین المللی مهاجرت را نا دیده گرفته و زندگی پناهجویان افغان را با خطر رو به می سازد.
 
الیزابت تان٬ مسوول بخش مصئونیت بین المللی کمیساریای عالی سازمان ملل متحد در امور پناهنده گان٬ گفته است که تاجیکستان بایستی روند اخراج پناهجویان افغان را متوقف بسازد.
 
خانم الیزابت افزود که چندین مرتبه در صحبت با مقامات تاجیکستان از آن کشور خواسته است تا برای افغانهایی که زندگی شان با خطر رو به روست پناهندگی بدهد.
 
بر اساس گزارش ها٬ تعداد زیادی از افغانهای پناهنده که در تاجیکستان زندگی می کنند هشدار های در مورد اخراج اجباری دریافت کرده اند و آنان این هشدار ها را از طریق واتس آپ به همدیگر ارسال می کنند.
 
دفتر مطبوعاتی وزارت داخله تاجیکستان گفته است که ۳۲ تن از افغانهایی که به خاطر نداشتن اسناد اقامت٬ قوانین این کشور را نقض کرده بودند٬ جریمه شده اند.
 
از ماه اسد سال گذشته که طالبان درافغانستان قدرت را به دست گرفته اند٬ حدود هشت هزار پناهجوی افغان به تاجیکستان رفته اند.