ولادیمیر پوتین و امامعلی رحمان، رؤسای جمهور روسیه و تاجیکستان در یک گفتگوی تلفنی با بررسی وضعیت افغانستان، درباره گسترش همکاری‌های دوجانبه برای تأمین امنیت منطقه تبادل نظر کردند.

خبرگزاری صدای افغان (آوا): منابع گزارش داده‌اند که رؤسای جمهور روسیه و تاجیکستان در گفتگوی تلفنی راجع به وضعیت افغانستان و امنیت منطقه باهم صحبت کرده‌اند.

امامعلی رحمان گفته است که افزایش فعالیت گروه‌های تروریستی، از جمله داعش در افغانستان منجر به ناامنی در کشورهای آسیای میانه می‌شود.

به گفته وی، از نیمه دوم آگوست سال ۲۰۲۱ هزاران نفر از اعضای گروه‌های تروریستی از افغانستان رها شدند.

به نقل‌قول از ولادیمیر پوتین رئیس‌جمهور روسیه هم گفته شده که وی بر این باور است که شمال افغانستان به پناهگاه داعش و القاعده تبدیل شده است.

گفتنی است که آقای رحمان قرار است در نشست آتی سران سازمان همکاری شانگهای که ماه سپتامبر در سمرقند برگزار می‌شود درباره افغانستان نیز صحبت کند.

به نوشته رسانه‌های روسی زبان، در نشست پیشرو علاوه بر رئیس‌جمهور تاجیکستان، احتمالاً رؤسای جمهور روسیه، چین، هند، پاکستان، ایران، ترکیه، قزاقستان، قرقیزستان و ازبکستان حضور خواهند داشت.