رئیس شرکت ملی برق تاجیکستان از پرداخت نشدن بدهی پول برق صادراتی خود به افغانستان انتقاد کرده‌ است. به گفته‌ی او، افغانستان بدهی‌ خود را به تدریج می‌پردازد و این بدهی هنوز به‌طور کامل پرداخت نشده است.

خبرگزاری صدای افغان (آوا): محمدعمر آسوزاده، رئیس شرکت ملی برق تاجیکستان گفته که افغانستان تاهنوز بدهی پول برق وارداتی خود را پرداخت نکرده است.

این مقام تاجیک روز گذشته (سه‌شنبه، ۲۱ سرطان) در یک نشست خبری گفته است که شرکت برق افغانستان (برشنا) بدهی‌های خود را به‌گونه‌ی تدریجی می‌پردازد که هنوز به گونه کامل آن را پرداخت نکرده است.

وی تصریح کرده است که تاجیکستان در حال حاضر روزانه (نُه میلیون کیلووات برق در ساعت) به افغانستان صادر می‌کند.

رئیس شرکت ملی برق تاجیکستان، میزان دقیق بدهی افغانستان به آن کشور را اعلام نکرده است.
به گزارش آسیا پلاس، رئیس شرکت ملی برق تاجیکستان در ماه جنوری سال جاری میلادی اعلام کرده بود که افغانستان ۳۳ میلیون دالر بخاطر واردات برق از تاجیکستان بدهکار است.

شرکت برق افغانستان (برشنا) در آن زمان قول داده بود که بدهی برق افغانستان را در ماه فبروری سال جاری به تاجیکستان پرداخت ‌کند.

براساس اطلاعات، تاجیکستان در سال گذشته در مجموع به بالغ بر ۵۶.۳ میلیون دالر برق به افغانستان صادر کرده است.

گفتنی است که افغانستان به‌شدت وابسته به برق وارداتی از کشورهای همسایه است. براساس آمارها، بخش اعظمی از نیازهای برق کشور از کشورهای تاجیکستان، ایران و ازبکستان تأمین می‌شود؛ با این حال بسیاری ولایات کشور از جمله کابل همواره با کمبود برق مواجه بود هستند.