فرماندهی مرکزی امریکا (سنتکام) از دیدار و گفت‌وگوی جنرال مایکل کوریلا با رئیس‌جمهور تاجیکستان و دیگر مقامات بلندپایه این کشور خبر داده است. به گفته‌ی این نهاد امریکایی، مسایل مهم امنیتی از جمله بهبود امنیت مرزهای تاجیکستان با افغانستان از محورهای این گفت‌وگوها بوده است.

خبرگزاری صدای افغان (آوا): فرماندهی مرکزی امریکا (سنتکام) می‌گوید که آماده است نیروهای امنیتی تاجیکستان را برای دفاع از مرزهای آن کشور آموزش دهد و تجهیز کند.

جنرال مایکل کوریلا، فرمانده سنتکام ارتش امریکا در سفر دو روزه‌اش به دوشنبه، با رئیس‌جمهور و مقامات ارشد امنیتی تاجیکستان درباره مسایل مهم امنیتی، از جمله بهبود امنیت مرزهای این کشور گفت‌وگو کرد.

جنرال کوریلا امنیت مرزهای تاجیکستان را حیاتی خواند و گفت: "مرزهای قوی تاجیکستان برای امنیت کل آسیای مرکزی حیاتی است."

کوریلا همچنین تصریح کرده که همکاری امنیتی با نیروهای امنیتی تاجیکستان بر مبارزه با تروریزم و عملیات‌های امنیتی مرزی متمرکز است.

حمایت‌ سنکام از تاجیکستان شامل نصب حسگرهای زمینی، تجهیزات مخابراتی و وسایط گزمه برای مرزبانان تاجیکستان می‌شود.

جنرال کوریلا تاکید کرد که نیروهای ویژه امریکا در 20 سال گذشته تجربه وسیعی در مبارزه با تروریزم به دست آوردند و می‌توانند این تجربه را با نیروهای مسلح تاجیکستان شریک سازند.

جنرال کوریلا به مقامات تاجیک اطمینان داد که کمک به تاجیکستان ادامه خواهد داشت. او گفت: "من به حاکمیت ملی و تمامیت ارضی تاجیکستان متعهد هستم."

این در حالی است که دولت تاجیکستان پس از تسلط امارت اسلامی بر افغانستان، از احتمال بروز ناامنی در مرز با افغانستان بارها ابراز نگرانی کرده است.