مسئولان محلی بدخشان می‌گویند که سرپرست وزارت اقتصاد امارت اسلامی طی سفرش به فیض‌آباد بر بهبود وضعیت اقتصادی مردم این ولایت تاکید کرده و وعدهٔ راه‌اندازی برنامه‌های اقتصادی را داده است.

خبرگزاری صدای افغان (آوا)- مزارشریف: بر بنیاد گفته‌های مسئولان محلی بدخشان با خبرنگار آوا، دین محمد حنیف؛ سرپرست وزارت اقتصاد، روز گذشته، شنبه (۲۱ جوزا)، وارد شهر فیض‌آباد شد و امروز طی نشستی با مسئولین محلی و شهروندان بدخشان دیدار و گفتگو کرد. 

به گفتهٔ آنان، وزیر اقتصاد به هدف بررسی وضعیت اقتصادی بدخشان به این ولایت سفرکرده و بر بهبود وضعیت معیشتی شهروندان این ولایت تاکید داشته است.

وزیر اقتصاد همچنین از راه‌اندازی برنامه‌های عملی برای بهبود اوضاع زندگی مردم فیض‌آباد و ولسوالی‌های این ولایت در آیندهٔ نزدیک خبر داده است.

سرپرست وزارت اقتصاد در حالی به بدخشان سفر داشته که پس از تحولات اخیر شهروندان بدخشان از افزایش بیکاری و رکود اقتصادشان شکایت داشتند و خواهان راه‌اندازی برنامه‌های اقتصادی و انکشافی بوده‌اند.