خبرگزاری آوا، کابل: ریاست اجرائیه اعلام کرد که هئیت عالیرتبه جمهوری اسلامی افغانستان به ریاست رئیس اجرائیه به منظور اشتراک در هژدهمین نشست سران حکومات سازمان همکاری‌شانگهای عازم شهر تاشکند پایتخت جمهوری ازبیکستان شد.

آقای عبدالله در جریان این سفر «قاهر رسول‌زاده»، صدراعظم جمهوری تاجیکستان دیدار کرد و جمهوری تاجیکستان را از دوستان و متحدان استراتیژیک افغانستان خواند.

عبدالله در ادامه از همکاری‌های تاجیکستان و توجه امام علی رحمان، رئیس جمهور تاجیکستان به مردم و حکومت افغانستان تشکر نموده و در باره انتخابات، تلاش‌ها برای صلح و آخرین تحولات کشور معلومات ارایه کرده است.

صدراعظم تاجیکستان نیز روابط میان دو کشور را حسنه خواند و تأکید کرد که افغانستان از دوستان و متحدان نزدیک تاجیکستان به شمار می‌رود.
وی همچنان افزود که کمیسیون‌ مشترک میان دو کشور به شکل منظم به کار خود ادامه می‌دهد.

آقای قاهر رسول‌زاده گفت که صلح و امنیت در افغانستان برای تاجیکستان از اهمیت فوق‌العاده برخوردار است چون ترانزیت، انتقال انرژی و عملی شدن برنامه‌های بزرگ منطقه‌یی مانند کاسا ۱۰۰۰ به امنیت در افغانستان بستگی دارد.

صدراعظم تاجیکستان ابراز امیدواری کرد که روابط اقتصادی و تجارتی میان دو کشور رونق بیش‌تر یابد.